မကွေးတိုင်း ပေါက်မြို့နယ်ရှိ ကျေးရွာသုံးရွာကို အကြမ်းဖက်စစ်ကောင်စီတပ်က ယမန်နေ့(ဧပြီ ၂၂ရက်) ညပိုင်းနှင့် ယနေ့နံနက်တို့တွင် မီးရှို့ခဲ့ကြောင်း ဒေသခံက ပြောသည်။
“မနေ့ညက ကျောင်းကုန်းကို။ ဒီနေ့မနက်က ကျွန်းကြီးရယ် အခုရေကျော်ရယ်ကို ထပ်ရှို့တာ။ အသေးစိတ်တော့မသိရသေးဘူး။ သူတို့က အင်အား ၆၀လောက်နဲ့စစ်ကြောင်းထိုးပြီး ရှို့နေတာ။ ရေကျော်က ဒီလအတွင်းမှာပဲ သူတို့ ရှို့ထားလို့ တစ်ရွာလုံးနီးပါးပြောင်သွားတာ။ အဲဒါကို ထပ်ရှို့တာ”ဟု ၎င်းက ဆိုသည်။
ပေါက်မြို့နယ်အတွင်း ယခုရက်ပိုင်းအတွင်း ဒေသခံပြည်သူ့ကာကွယ်ရေးတပ်ဖွဲ့ဝင်များနှင့် စစ်ကောင်စီအကြား ထိတွေ့တိုက်ပွဲဖြစ်နေသည်ဟု ကြားသိရကြောင်းလည်း ဒေသခံက ပြောသည်။
ဧပြီ ၇ရက်မှစ၍ ပေါက်မြို့နယ်အတွင်း စစ်ကြောင်းထိုးလာသည့် စစ်ကောင်စီတပ်သည် ပေါက်မြို့နယ်တောင်ပိုင်း၊ အရှေ့တောင်ပိုင်း ဒေသများရှိ ကျေးရွာများကို မီးရှို့ဖျက်ဆီးမှုများ ဆက်တိုက်လုပ်ဆောင်ခဲ့သည်။ ထို့ပြင် ပခုက္ကူနှင့် ဆိပ်ဖြူမြို့နယ်များရှိ ကျေးရွာများကိုလည်း စစ်ကောင်စီတပ်က မီးရှို့ဖျက်ဆီးခဲ့ရာ နှစ်ပတ်ကျော်ကာလအတွင်း မြို့နယ် သုံးခုမှ ကျေးရွာပေါင်း ၂၀ကျော်ကို မီးရှို့ဖျက်ဆီးခဲ့သည်။
Public Service Announcement
ကျေးရွာအများအပြားမှ ပြည်သူလူထုများလည်း စစ်ကောင်စီရန်ကို ကြောက်၍ ဘေးကင်းရာသို့ ထွက်ပြေးတိမ်းရှောင်နေကြရပြီး အခက်အခဲများစွာ ကြုံနေရသည်။
ပေါက်မြို့နယ် ကျောင်းကုန်းရွာကို ဧပြီ ၂၂ရက် ညပိုင်းတွင် စစ်တပ်က မီးရှို့ဖျက်ဆီးပြီးနောက် ဧပြီ ၂၃ရက်တွင် ကျွန်းကြီးရွာကို ထပ်မံ မီးရှို့ဖျက်ဆီးနေစဥ်၊ ဓာတ်ပုံ – Thiha Kyawswar/FB
