▪️ပြည်သူတစ်ဦးကိုလည်း ပစ်သတ်သွားဟုဆို
မကွေးတိုင်း၊ ပေါက်မြို့နယ်ရှိ ကျေးရွာများအား အကြမ်းဖက်စစ်တပ်က စစ်ကြောင်းထိုးကာ လူနေအိမ်များသာမက ကွမ်းခြံများကိုပါ မီးရှို့ဖျက်ဆီးမှုများပြုလုပ်ပြီး ပြည်သူတစ်ဦးကိုလည်း ပစ်သတ်သွားကြောင်း ဒေသခံများက ပြောသည်။
ယမန်နေ့ (ဧပြီ ၂၃ ရက်)က မကွေးတိုင်း ပေါက်မြို့နယ် အရှေ့တောင်ပိုင်း ကျွန်းကြီးကျေးရွာရှိ အပြစ်မဲ့ပြည်သူ နေအိမ်အချို့နှင့် ကွမ်းခြံများကို အကြမ်းဖက်စစ်ကောင်စီတပ်နှင့် ပျူစောထီးများက မီးရှို့ဖျက်ဆီးခဲ့ပြီး ကျေးရွာပြည်သူများ၏ ပစ္စည်းများကိုလည်း အတင်း အဓမ္မသိမ်းဆည်းသွားကြောင်း၊ ရွာနေပြည်သူများလည်း ထွက်ပြေးတိမ်းရှောင်ခဲ့ရကြောင်း ဒေသခံများက ပြောသည်။
ညနေပိုင်းတွင်လည်း ပေါက်မြို့နယ်အရှေ့တောင်ပိုင်း၊ ကျက်အိုးရွာသစ်ကျေးရွာရှိ နေအိမ်အချို့ကိုလည်း မီးရှို့ဖျက်ဆီးမှုများပြုလုပ်သွားကြောင်း၊ ယမန်နေ့ည ၁၀နာရီကျော်တွင် ညောင်ရင်းကျေးရွာကိုဖြတ်သွားသော ပြည်သူ တစ်ဦးကိုလည်း ပစ်သတ်သွားကြောင်း၊ ထို့အပြင် ညောင်ရင်းရွာရှိ နာရေးကူညီမှုအသင်း၏ ကားဘီးများကိုလည်း ဖောက်ပြီး မှန်များရိုက်ခွဲသွားကြောင်း ဒေသခံများက ပြောသည်။
Public Service Announcement
“အသတ်ခံရသော ပြည်သူမှာမရှောင်တိမ်းမိဘဲ အိမ်မှာရှိနေစဉ်ဝင်ပြီး အပစ်ခံရတာလို့သိရပါတယ်။ပြည်သူတစ်ဦးလည်း ပျောက်နေပြီး ပြည်သူနှစ်ဦးကတော့လူသားဒိုင်းအကာသဘောမျိုး ဇီးပြားစခန်းဆီ ဖမ်းခေါ်သွားပါတယ်။ပြန်လည်လွတ်မြောက်ခြင်းရှိ/မရှိ အတည်မပြုနိုင်သေးပါဘူး။ရွာနားတဝိုက်မှာကင်းပုန်းများချထားတာရှိတယ်။”ဟု ပေါက်သတင်းစာမျက်နှာက ရေးသားထားသည်။
အကြမ်းဖက်စစ်တပ်သည် စစ်ကြောင်းထိုး၍ နယ်မြေရှင်းလင်းရေး ပုံစံမျိုးလုပ်လာခြင်းဖြစ်ပြီး အင်အား၈၀မှ ၁၀၀ကြား ရှိနိုင်ကြောင်း၊ အကြမ်းဖက်စစ်တပ်၏ စစ်ကြောင်းထိုးလာမှုကြောင့် ချောင်းကူးရွာ၊ ကျွန်းတိုင်းရွာ၊ ဂွေးဂုံရွာ၊ စသိန်းရွာ၊ညောင်ရင်းရွာ အစရှိသည့်ကျေးရွာများရှိ ပြည်သူများထွက်ပြေးတိမ်းရှောင်နေရကြောင်း ဒေသခံများက ပြောသည်။
ယမန်နေ့(ဧပြီ ၂၃ ရက်)က ပေါက်မြို့နယ် စသိန်းရွာသို့ အင်အား ၈၀ခန့်ဖြင့် စစ်ကြောင်းထိုးလာသော အကြမ်းဖက်စစ်ကောင်စီတပ်အား ပခုက္ကူ တော်လှန် ရေးတပ်ဦး PRF၊ Pakokku Generation Z၊ ပြည်သူ့ကာကွယ်ရေးတပ်မတော် ပေါက်မြို့နယ်၊ ပြည်သူ့ကာကွယ်ရေးတပ်ဖွဲ့ မြိုင်မြို့နယ်နှင့် ပေါက် မဟာမိတ်တပ်ပေါင်းစုတို့ ပူးပေါင်းတိုက်ခိုက်ရာ ၆ နာရီခန့် အပြန်အလှန် ပစ်ခတ်ခဲ့ကြကြောင်း၊ အကြမ်းဖက်စစ်တပ်ဘက်မှ ငါးဦးသေဆုံးပြီး ဒဏ်ရာရသူအများအပြားရှိသည်ဟု သိရကြောင်း၊ ပြည်သူ့ကာကွယ်ရေးတပ်ပေါင်းစုများ အထိအခိုက်မရှိ အောင်မြင်စွာ ခုခံတိုက်ခိုက်နိုင်ခဲ့ကြောင်း ပြည်သူ့ကာကွယ်ရေးတပ်မတော်-ပေါက်မြို့နယ်က သတင်းထုတ်ပြန်သည်။
အကြမ်းဖက်စစ်တပ်သည် ဧပြီလဆန်းပိုင်းကလည်း ပေါက်မြို့နယ်ရှိ ကျေးရွာများဖြစ်သော ရေကျော်ရွာ – အိမ်ခြေ ၁၅၀ ခန့် ၊ကျောင်းကုန်းရွာတွင်လည်းလေယာဉ်ဖြင့် ဗုံးကျဲ၊ စက်သေနတ်ဖြင့် ပစ်၍ အိမ်ခြေ ၇၅အိမ်ခန့်၊ လက်ပံလှရွာ၊ လယ်ယာရွာနှင့် အင်းငယ်ဒေါင့်ကျေးရွာများတွင် စုစုပေါင်း အိမ်ခြေ ၅၀၀ခန့်၊ ဒိန်းကွင်းရွာအိမ်ခြေ ၃၀ခန့်၊ တောင်ချိုရွာ၊တောင်ဘက်ရွာနှင့် နယ်မြေချင်းဆက်နေသော ဆိပ်ဖြူမြို့နယ် ရှားလှရွာတို့ကိုပါ မီးရှို့ဖျက်ဆီးမှုများ ပြုလုပ်ခဲ့ကြောင်း ပြည်သူ့ကာကွယ် ရေးတပ်မတော်-ပေါက်မြို့နယ်က အသိပေးထား သည်။
