စစ်ကိုင်းတိုင်း၊ စစ်ကိုင်းမြို့နယ်တွင် အကြမ်းဖက်စစ်ကောင်စီတပ်၏ ၀င်ရောက်စီးနင်း ပစ်ခတ်မီးရှို့မှုများကြောင့် မြို့နယ်အတွင်း ကျေးရွာ၁၅ ရွာထက်မနည်းရှိ ပြည်သူသောင်းချီ ဘေးလွတ်ရာနေရာများသို့ တိမ်းရှောင်နေရပြီး အကူအညီများလိုအပ်နေကြောင်း ဒေသခံများက ပြောသည်။
စစ်ကိုင်းမြို့အနောက်မြောက် ဆားတောင်တိုက်နယ်အတွင်းရှိ သာစည်လေး၊ဘုရားလှ၊ ညောင်ပင်ရှည် ကျေးရွာများအား ဧပြီ ဒုတိယအပတ်မှစတင်ကာ အကြမ်းဖက် စစ်ကောင်စီတပ်များက လက်နက်ကြီးဖြင့် ပစ်ခတ်၀င်ရောက်မီးရှို့ခဲ့ခြင်းကြောင့် အဆိုပါကျေးရွာများ ရွာလုံးကျွတ်နီးပါးမီးလောင်ခဲ့ရကာ သာစည်လေးနှင့် ညောင်ပင်ရှည်ရွာတွင် စစ်ကောင်စီတပ်နှင့် ဒေသကာကွယ်ရေးတပ်ဖွဲ့များထိတွေ့တိုက်ပွဲဖြစ်ပွားခဲ့ပြီး နှစ်ဖက်ထိခိုက်သေဆုံးမှုများဖြစ်ပွားခဲ့ကြောင်း၊ အဆိုပါကျေးရွာများ မီးရှို့ခံရမှုနှင့် ဒေသခံပြည်သူအချို့ထိခိုက်သေဆုံးမှုဖြစ်ပွားခဲ့ခြင်းကြောင့် အနီးတစ်ဝိုက်ကျေးရွာများဖြစ်သော သာဇင်၊တလိုင်းကျွန်း၊မူးသာ၊ထန်းတောဆိပ်၊မင်းရွာ၊ရွှေစည်းခုံ၊ တောင်မြို့၊အင်းစ၊တောင်ကြား၊ဒီပဲယင်းကွဲ၊မန်ကျည်းကုန်း၊စံသစ် စသည့်ကျေးရွာများမှ ပြည်သူများ ဘေးလွတ်ရာနေရာများသို့ရွေ့ပြောင်းနေထိုင်နေရကြောင်း စစ်ကိုင်းမြို့နယ်သတင်းမှန်ပြန်ကြားရေးက သတင်းထုတ်ပြန်သည်။
” ကျေးရွာတွေက လူအကုန်ထွက်ပြေးလာကြတာ။ မူးကိုကူးပြီး အ၀တ်တစ်ထည်ကိုယ်တစ်ခုနဲ့ပြေးလာရတဲ့သူတွေများတယ်။ အ၀တ်အစား၊ဆေးဝါးတွေလိုတယ်။ ကလေးငယ်နဲ့ သက်ကြီးရွယ်အိုတွေများတော့ ဓာတ်ဆားနဲ့ ရေသန့်လိုအပ်ပါတယ်။ နေရာထိုင်ခင်းအတွက်က ကျနော်တို့တက်နိုင်သလောက်စီစဉ်ပေးထားတယ်။ ဒါပေမဲ့ လူကများတော့ အမိုးအကာလည်း မလုပ်ပေးနိုင်တော့ တောတွေ၊ခြံတွေထဲမှာ နေရာချထားရတယ်။ ရွာလုံး ကျွတ်ပြေးလာရတဲ့ ရွာတွေနဲ့ ဟိုတစ်စုဒီတစ်စုရှောင်လာကြတဲ့သူတွေနဲ့ပေါင်းရင် လူဦးရေသောင်းချီရှိ နိုင်မယ် တစ်ချို့ကတော့ ဆွေမျိုးတွေရှိတဲ့ မြို့နယ်တွေကို ဒီကတစ်ဆင့်ထွက်သွားကြတယ်။ အခုစစ်ဘေးရှောင်တဲ့နေရာတွေမှ စစ်တပ်ကလာပစ်လည်း အကုန်သေကြရုံပေါ့ဗျာ ” ဟု မြင်းမူမြို့နယ်မှ စစ်ဘေးရှောင်များအားကူညီနေသူတစ်ဦးက Sagaing District Medical Team သို့ဖြေကြားထားသည်။
အကြမ်းဖက်စစ်ကောင်စီတပ်သည် စစ်ကိုင်းမြို့နယ်နှင့် နယ်ချင်းထိဆက်နေသော ဝက်လက်မြို့နယ်တွင်လည်း ယမန်နေ့ (ဧပြီ ၂၄ ရက်)က ဧရာဝတီမြစ်ဘေးကျေးရွာများကိုစစ်ကြောင်းထိုးနေပြီး မီးရှို့ဖျက်ဆီးမှုများ ပြုလုပ်နေသည်။
Public Service Announcement
