မလေးရှားအစိုးရသည် မြန်မာအရပ်သားအစိုးရ NUG နှင့်တွေ့ဆုံဆွေးနွေးခဲ့ကြောင်း နိုင်ငံခြား ရေးဝန်ကြီး Saifuddin Abdullah က အတည်ပြုပြောကြားသည်။
အာဆီယံဦးဆောင်နိုင်ငံက အမျိုးသားညီညွတ်ရေးအစိုးရ NUG နှင့် ဆက်သွယ်ဆွေးနွေးကြောင်း ဝန်ခံပြောကြားခြင်းမှာ ပထမဆုံးအကြိမ်ဖြစ်ပြီး NUG နိုင်ငံခြားရေးဝန်ကြီး ဒေါ်ဇင်မာအောင်၊ NUCC(အမျိုးသားညီညွတ်ရေးအတိုင်ပင်ခံကောင်စီ)ခေါင်းဆောင်တို့နှင့် အလွတ်သဘောတွေ့ဆုံခဲ့သည်ဟု မလေးရှားနိုင်ငံခြားရေးဝန်ကြီး Saifuddin Abdullah က ပြောသည်။
အထက်ပါတွေ့ဆုံမှုများသည် ဖေဖော်ဝါရီလလယ်ပိုင်းက ကျင်းပခဲ့သော အာဆီယံနိုင်ငံခြားရေး ဝန်ကြီးများအစည်းအဝေးမတိုင်မီ အွန်လိုင်းဗီဒီယိုကွန်ဖရင့်မှတဆင့် တွေ့ဆုံခဲ့ခြင်းဖြစ်သည်ဟု ဆိုသည်။ထိုကြောင့်မလေးရှားနိုင်ငံသည် အာဆီယံနိုင်ငံများထဲတွင် NUGနှင့်တွေ့ဆုံဆွေးနွေးခဲ့ကြောင်း ပထမဆုံးထုတ်ဖော်ပြောဆိုသောနိုင်ငံဖြစ်လာသည်။
အာဏာသိမ်းချိန်မှစ၍ ၁၆ လအတွင်း မြန်မာနိုင်ငံသည် ပဋိပက္ခထဲသို့ ဆင်းသက်သွားပြီး စီးပွားရေးမလည်ပတ်တော့သည့် အခြေအနေကို ဒေသတွင်းစံနှုန်းများနှင့်အညီ မလေးရှားနိုင်ငံခြား ရေးဝန်ကြီးက ထုတ်ဖော်ပြောခဲ့သည်။
Public Service Announcement
ထို့အပြင် စစ်ကောင်စီသည် အာဆီယံဘုံသဘောတူညီချက် ၅ ရပ်ကို အကောင်အထည်ဖော်မှု ဆက်လက်အချိန်ဆွဲနေပါက မလေးရှားအစိုးရသည် NUG နှင့် တွေ့ဆုံဆွေးနွေးနိုင်ဖွယ်ရှိကြောင်း Saifuddin Abdullah က ပြီးခဲ့သည့် အောက်တိုဘာတွင် လွှတ်တော်သို့ ပြောဆိုခဲ့သည်။
စစ်ကောင်စီသည် ယခင်နှစ် ဧပြီ ၂၄ ရက်က အာဆီယံခေါင်းဆောင်များ သဘောတူချမှတ်ခဲ့သော ဆုံးဖြတ်ချက် ၅ ရပ်ကို လိုက်နာဆောင်ရွက်ခြင်းမရှိဘဲ ပြည်သူလူထုအပေါ် လူမဆန်သော အကြမ်းဖက်နှိပ်စက်မှုများကို ဆက်လက်ကျူးလွန်နေ၍ အနောက်နိုင်ငံများက စစ်ကောင်စီကို ကန့် ကွက်ရှုတ်ချထားသည်။
