စစ်ကိုင်းတိုင်း ကလေးမြို့နယ်တွင် အကြမ်းဖက်စစ်ကောင်စီစစ်ကြောင်း ရောက်ရှိလာ၍ ဒေသခံများက မြစ်သာမြစ်ကူးဝါးတံတားကို ဖြတ်ကူးထွက်ပြေးစဥ် တံတားကျိုးကျပြီး ကလေးငယ်အချို့အပါအဝင် ခြောက်ဦး မျောပါသေဆုံးသွားသည်။
ယနေ့(ဧပြီ ၂၇ရက်)နံနက်တွင် ကလေးမြို့နယ်၊ ဒိုးပင်ရွာနှင့် အရှေ့စည်းကျေးရွာအနီး စစ်ကောင်စီစစ်ကြောင်းရောက်လာ၍ ဒေသခံများ ထွက်ပြေးကြရင် အထက်ပါ ဖြစ်ရပ်ကြုံတွေ့ခဲ့ခြင်းဖြစ်သည်။
“တံတားက နွေမှာဖြတ်ကူးဖို့ ယာယီထိုးထားတဲ့ တံတားမျိုး။ လူတွေ စုပြုံတက်တော့ ကျိုးကျသွားတာ။ စစ်တပ်ကို အရမ်းကြောက်နေကြပြီး ရွာလုံးကျွတ်ထွက်ပြေးရင် ဖြစ်ရတာ”ဟု ဒေသခံတစ်ဦးက ပြောသည်။
သေဆုံးသူ ခြောက်ဦးတွင် လသားအရွယ်ကလေးငယ်နှင့် မိခင်ဖြစ်သူ ပါဝင်သွားသည်ဟု ဒေသခံများက ပြောသည်။ စစ်ကောင်စီက စစ်ကြောင်းထိုးနေ၍ ရုပ်အလောင်းများကို ယနေ့ညအထိ မကောက်ယူနိုင်သေးကြောင်း သတင်းရရှိသည်။
ကလေးမြို့နယ်အတွင်း အကြမ်းဖက်စစ်ကောင်စီ၏ ပရမ်းပတာလုပ်ဆောင် ချက်များကြောင့် အရပ်သားများမှာ ဆိုးရွားသည့် ဘေးဒုက္ခများ ရင်ဆိုင်နေရသည်။ ပြီးခဲ့သည့် ဖေဖော်ဝါရီကလည်း ကလေးမြို့နယ် ချောင်းခွကျေးရွာမှ ဆယ်ကျော်သက် မိန်းကလေးနှစ်ဦးနှင့် မိခင်ကို စစ်ကောင်စီက ဖမ်းဆီးပြီး မီးရှို့သတ်ဖြတ်သွားသည်ဟု မြို့ခံများက ပြောသည်။