ဖားအံအကျဉ်းထောင်ထဲမှာ နိုင်ငံရေးအကျဉ်းသားတွေရဲ့တောင်းဆိုဆန္ဒဖော်ထုတ်မှု ၁၀ ရက်အတွင်း နှစ်ကြိမ်ဖြစ်ပွားခဲ့တယ်လို့ အကျဉ်းထောင်နဲ့နီးစပ်သူတွေရဲ့ ပြောကြားချက်အရ သိရပါတယ်။
နိုင်ငံရေးအကျဉ်းသားတစ်ဦးကို အခြားရာဇဝတ်အကျဉ်းသားတွေက အကြောင်းမဲ့ရိုက်နှက်ပြုလုပ်တာနဲ့ပတ်သက်လို့ စစ်ကောင်စီရဲ့အကျဉ်းထောင်တာဝန်ရှိသူတွေက ကျေနပ်လောက်တဲ့အထိ ဖြေရှင်းပေးနိုင်ခြင်းမရှိတဲ့အတွက် ဒီကနေ့ ဧပြီ ၂၇ ရက်ညနေပိုင်းက ဖားအံအကျဉ်းထောင်တွင်းမှာ နိုင်ငံရေးအကျဉ်းသားတွေက ဆန္ဒဖော်ထုတ်နေတာဖြစ်ပါတယ်။
နိုင်ငံရေးအကျဉ်းသားတွေဟာ ကြွေးကြော်သံတွေရွတ်ဆိုပြီး နိုင်ငံရေးသီချင်းတွေ သီဆိုကာ ဆန္ဒဖော်ထုတ်နေတာဖြစ်တယ်လို့ အကျဉ်းထောင်နဲ့နီးစပ်သူတွေက ပြောကြပါတယ်။
ဖားအံအကျဉ်းထောင်ထဲမှာ ပြီးခဲ့တဲ့ ဧပြီ ၁၇ ရက် နှစ်ဆန်းတစ်ရက်နေ့ကလည်း နိုင်ငံရေးအကျဉ်းသားတွေဟာ နိုင်ငံရေးသီချင်းသီဆိုတာနဲ့ ကြွေးကြော်သံတွေ တောင်းဆိုဆန္ဒဖော်ထုတ်ခဲ့သေးတာဖြစ်ပြီး ၁၀ ရက်အကြာ နောက်ထပ်တစ်ကြိမ် ထပ်မံပြီး တောင်းဆိုဆန္ဒဖော်ထုတ်ခဲ့သေးတာ ဖြစ်ပါတယ်။
Public Service Announcement
