ရွာငံဒေသတိုက်ပွဲတွင် အကြမ်းဖက်စစ်ကောင်စီတပ်ဖွဲ့ဝင် ၁၀ဦးထက်မနည်း တိုက်ခိုက်သုတ်သင်ပြီးနောက် သေနတ်ကျည်မလောက်၍ ဆုတ်ခွာလာသည့် ပြည်သူ့ကာကွယ်ရေးတပ်ဖွဲ့သည် လမ်းခုလပ်တွင် စစ်ကောင်စီဘက်ကပစ်သည့် လက်နက်ကြီးကျည်ထိမှန်ပြီး ရဲဘော် ငါးဦးကျဆုံးခဲ့ရသည်။
ဓနုကိုယ်ပိုင်အုပ်ချုပ်ခွင့်ရဒေသ ရွာငံမြို့နယ်အတွင်း ဧပြီ ၁၅ရက်က ဖြစ်ပွားခဲ့သည့် တိုက်ပွဲဖြစ်စဥ်ကို
ရွာငံပြည်သူ့ကာကွယ်ရေးတပ်ဖွဲ့ (YPDF)က ယနေ့ (ဧပြီ ၃၀ရက်)တွင် ထုတ်ပြန်ခြင်းဖြစ်သည်။
ရွာငံမြို့နယ် တဲ့လုရွာနှင့်တောင်ဦးရွာအကြား ထိတွေ့တိုက်ပွဲဖြစ်ပွားခဲ့ခြင်းဖြစ်ပြီး အင်တာနက်အခက်အခဲများကြောင့် ယခုအချိန်မှသာ သတင်းထုတ်ပြန်ရခြင်းဖြစ်ကြောင်း YPDFက ရှင်းပြထားသည်။
ထိုနေ့က ပန်းလောင်မြစ်ကြောင်းတစ်လျှောက်စစ်ကြောင်းထိုးပြီးပြန်လာသောအကြမ်းဖက်စစ်ကောင်စီတပ်ကို YPDFက တိုက်ခိုက်ခဲ့ရာ အကြမ်းဖက်စစ်ကောင်စစ်ဘက်မှ အရာရှိ တစ်ဦးအပါအဝင် ၁၀ဦးထက်မနည်းသေဆုံးခဲ့ကြောင်း၊ကျည်ဆန်မလုံလောက်ခြင်း၊လက်နက်အင်အားမမျှခြင်း၊ စစ်ကောင်စီဘက်မှ လက်နက်ကြီးများဖြင့် အဆက်မပြတ် ပစ်ခက်ခြင်းတို့ကြောင့် ပြန်လည်ဆုတ်ခွာခဲ့ရစဥ် စစ်ကောင်စီဘက်က ပစ်လိုက်သည့်လက်နက်ကြီးထိမှန်ခဲ့ပြီး YPDFရဲဘော်ငါးဦး ကျဆုံးခဲ့ကာ တစ်ဦးဒဏ်ရာရရှိခဲ့သည်ဟု ထုတ်ပြန်ထားသည်။
Public Service Announcement
ကျဆုံးသွားခဲ့ရသောရဲဘော်များအတွက် သွေးကြွေးပြန်ဆပ်သွားမည်ဖြစ်ပြီး ဒီမိုကရေစီရရှိသည်အထိ ဇွဲမလျော့ဘဲ ဆက်လက်တိုက်ပွဲဝင်သွားမည်ဟုလည်း YPDFက ပြောကြားထားသည်။
စစ်ကောင်စီအား တိုက်ခိုက်ရေး အရှိန်မြင့်လာသည့် ဓနုကိုယ်ပိုင်အုပ်ချုပ်ခွင့်ရဒေသကို စစ်ကောင်စီက နည်းမျိုးစုံ ဖိနှိပ်နေသည်။ ဧပြီ ၂၀ရက်နောက်ပိုင်း အရပ်သား ၆ ဦးထက်မနည်းကို သတ်ဖြတ်ခဲ့သလို နေအိမ်အများအပြားကို မီးရှို့ဖျက်ဆီခဲ့သည်။
ပြည်သူ့ကာကွယ်ရေးအဖွဲ့များကို တိုက်ခိုက်ခိုင်းရန်အတွက် ရွာငံမြို့ကျေးရွာအချို့မှ လူငယ်များကိုစစ်ကောင်စီက ပေါ်တာဆွဲနေပြီး လူမစုပေးပါက ရွာလုံး ကျွတ်မီးရှို့မည်ဟုလည်း ခြိမ်းခြောက်နေသည်ဟု ဒေသခံများက ပြောသည်။
ပြည်သူ့ကာကွယ်ရေးအဖွဲ့များကလည်း စစ်ကောင်စီကို တိုက်ခိုက်ရန် အမျိုးသားညီညွတ်ရေးအစိုးရနှင့်ချိတ်ဆက်ကာ ခုခံတော်လှန်စစ်ကို အရှိန်မြှင့်ထားသည်။ရှမ်းပြည်နယ်တောင်ပိုင်းဒေသအခြေစိုက် ပြည်သူ့ကာ ကွယ်ရေးအဖွဲ့ ခုနှစ်ဖွဲ့က အမျိုးသားညီညွတ်ရေးအစိုးရ ၏ ဦးဆောင်မှုနှင့်အတူ ရှမ်းတောင်တော်လှန်ရေးလူငယ်များအဖွဲ့ ဖွဲ့စည်းထားသည်။
လက်နက်အင်အားမမျှဘဲ တိုက်ခိုက်နေရသည့် စစ်အာဏာရှင်အမြစ်ဖြတ်ဖြုတ်ချနိုင်ရေး တိုက်ပွဲတွင် ပြည်သူလူထု၏ ထောက်ပံ့မှုသည် အရေးကြီးဆုံးဖြစ်၍ လက်နက်ခဲယမ်းဖိုး လှူဒါန်းပေးပါရန်လည်း ရှမ်းပြည်နယ်တောင်ပိုင်းဒေသအခြေစိုက် ပြည်သူ့ကာကွယ်ရေးအဖွဲ့များက မေတ္တာရပ်ခံထားသည်။
