စစ်တပ်အာဏာသိမ်းပြီးနောက်ပိုင်း ကရင်နီဒေသ၌ ဖြစ်ပွားသည့် တိုက်ပွဲများတွင် စစ်ကောင်စီတပ်မှ သေဆုံးသူ ၁,၀၆၅ ဦးရှိကြောင်း တိုးတက်သောကရင်နီပြည်သူ့အင်အားစု(PKPF)က ယနေ့ သတင်းထုတ်ပြန်သည်။
၂၀၂၁ ဖေဖာဝါရီ ၁ရက်မှ ၂၀၂၂ ဧပြီ ၃၀ရက်အထိ ကရင်နီဒေသ စစ်ရေး၊ နိုင်ငံရေး၊ လူ့အခွင့်အရေးအချိုးဖောက်ခံရမှု အခြေအနေများကို PKPFက ထုတ်ပြန်ခဲ့ခြင်းဖြစ်သည်။
စစ်တပ်အာဏာသိမ်းပြီးနောက် မေလ ၂၀ရက်မှစ၍ ကရင်နီဒေသ၌ စစ်ကောင်စီတပ်ကို ခုခံတိုက်ခိုက်သည့် တိုက်ပွဲများ ပေါ်ပေါက်လာရာ တိုက်ပွဲစုစုပေါင်း ၂၇၄ ကြိမ်ဖြစ်ခဲ့သည်ဟု ဆိုသည်။
စစ်ကောင်စီတပ်ကို ကရင်နီတပ်မတော်(KA)၊ ကရင်နီအမျိုးသားများကာကွယ်ရေးတပ်(KNDF)၊ ဒေသခံ ပြည်သူ့ကာကွယ်ရေးတပ်(PDF)တပ်များနှင့် တော်လှန်ရေးအင်အားစုများက တော်လှန်တိုက်ခိုက်နေခြင်းဖြစ်သည်။
တိုက်ပွဲများအတွင်း နှင့် စစ်ကောင်စီတပ်၏ အကြမ်းဖက် တိုက်ခိုက်မှု ထိုးစစ်ဆင်မှုများကြောင့် KNDF၊ PDFနှင့် KA တပ်ဖွဲ့ဝင် စုစုပေါင်း ၁၁၆ဦး ကျဆုံးခဲ့သည်ဟုဖော်ပြထားသည်။ ထို့ပြင် စစ်ကောင်စီတပ်၏ အကြမ်းဖက် လုပ်ရပ်များကြောင့် အရပ်သားပြည်သူ ၂၆၂ဦး အသက်ဆုံးရှုံးခဲ့ရကြောင်း ထုတ်ပြန်သည်။ ထို့ပြင် စစ်ကောင်စီတပ်က မတရားဖမ်းဆီးခဲ့သည့် ပြည်သူ ၂၃၀ ကျော်ရှိသည်ဟုဆိုသည်။
တိုက်ပွဲများ၌ အထိနာခဲ့သည့် စစ်ကောင်စီတပ်သည် လေကြောင်းတိုက်ခိုက်မှုများ အကြိမ်ကြိမ် ပြုလုပ်ခဲ့ရာ လေကြောင်းတိုက်ခိုက်မှု (၁၁၈)ကြိမ်ရှိကြောင်း ထုတ်ပြန်ထားသည်။
ထို့အပြင် စစ်ကောင်စီတပ်၏ လက်နက်ကြီးပစ်ခတ်မှု၊ မီးရှို့မှုများကြောင့် ဘာသာရေး အဆောက်အအုံ ၁၇လုံးနှင့် ပြည်သူလူထု နေအိမ် ၁,၀၀၀ကျော် ပျက်စီးဆုံးရှုံးခဲ့ရကြောင်း ဖော်ပြထားသည်။
လက်ရှိအချိန်ထိ ကရင်နီဒေသရှိ ဒီးမော့ဆို၊ ဖရူဆို၊ လွိုင်ကော်၊ ဘောလခဲ မြို့နယ်များနှင့် ရှမ်း-ကယား နယ်စပ် ဖယ်ခုံမြို့နယ်တို့၌ တိုက်ပွဲများ မကြာခဏ ဖြစ်ပွားနေသည်။