မြောင် MRA PDF စခန်းလာရောက်စီးနင်းသည့် အကြမ်းဖက်စစ်တပ်အား နှစ်ကြိမ်တိုင် ပြန်လည်ခုခံတိုက်ခိုက်ရာ အကြမ်းဖက်အုပ်စုမှ ၃ ဦးသေဆုံးပြီး အများအပြား ထိခိုက်ဒဏ်ရာ ရရှိသွားကြောင်း Myaung Revolution Army (MRA)က သတင်းထုတ်ပြန်သည်။
မေလ (၁) ရက်နေ့ နံနက် (၇:၀၀) ခန့်က အကြမ်းဖက်စစ်တပ်နှင့်ရဲ အင်အား တစ်ရာကျော်ခန့်သည် လက်နက်ကြီး လက်နက်ငယ် တို့ဖြင့် Myaung Revolution Army (MRA) ဌာနချုပ် စခန်းကို ဝင်ရောက်စီးနင်း တိုက်ခိုက်ခဲ့သည်။
ရဲဘော်များအားလုံး ဘေးကင်းလုံခြုံစွာ ဆုတ်ခွာနိုင်ပြီး MRA စခန်းရှိ တဲများအား အကြမ်းဖက်အုပ်စုမှ မီးရှို့ဖျက်ဆီးနေစဉ်တွင် ပဒေသာမိုင်းများဖြင့် ပြန်လည်မိုင်းဆွဲတိုက်ခိုက်ခဲ့ကြောင်း MRAက ပြောသည်။ယင်း တိုက်ခိုက်မှုတွင် အကြမ်းဖက်စစ်သား (၁၄)ဦး ပြင်းထန်စွာ ထိခိုက်ဒဏ်ရာ ရသွားပြီး (၃) ဦးမှာ နေရာတွင် သေဆုံးခဲ့သည်ဟုဖော်ပြထားသည်။
တိုက်ပွဲတွင်အကြမ်းဖက်စစ်တပ်မှ Drone များဖြင့် တိုက်ခိုက်ခဲ့ပြီး MRAကလည်း Drone ဖြင့် ပြန်လည် တိုက်ခိုက်ခဲ့ကြောင်း၊အကြမ်းဖက်အုပ်စုမှာ ဒဏ်ရာရသူများ ကို ထမ်းသယ်၍ စခန်းမှ ဆုတ်ခွာသွားကြောင်း MRAက ပြောသည်။
Public Service Announcement
ဆုတ်ခွာသွားသည့် အကြမ်းဖက်အုပ်စုကို ဒရုန်းဖြင့် ထပ်မံတိုက်ခိုက်ရာ စစ်ကောင်စီ တပ်သား (၅) ဦး ပြင်းထန်ဒဏ်ရာ ရရှိပြီး စစ်ကောင်စီဘက်မှလည်း လက်နက်ကြီး လက်နက်ငယ်တို့ဖြင့် ပြန်လည် ပစ်ခတ်ခဲ့သည်ဟု MRAက ဆိုသည်။
ယမန်နေ့ မေလ ၂ ရက်နေ့ နံနက်ပိုင်းက မြောင် PDF နှင့် မဟာမိတ် အဖွဲ့ ၂၅ဖွဲကျော် စုပေါင်း၍ ၃နာရီခွဲကြာတိုက်ပွဲဖြစ်ပွားခဲ့ပြီး အကြမ်းဖက်စစ်တပ်ဘက်မှ ၃၅နှင့် ၄၀ကြားသေဆုံးခဲ့သည်ဟု မြောင် PDFက အသိပေးထားသည်။
