စစ်ကောင်စီထိန်းချုပ်ထားသည့် ဗဟိုဘဏ်မှ နိုင်ငံတော် အရံရွှေများရောင်းချပေးရန် တင်ပြတောင်းဆိုမည်ဟု ရွှေကုန်သည်များတွေ့ဆုံစဉ် ဆုံးဖြတ်ခဲ့သည်ဟု ရန်ကုန်တိုင်းရွှေလုပ်ငန်းရှင်များအသင်းက ယနေ့ထုတ်ပြန်သည်။
စစ်ကောင်စီအလိုကျဆောင်ရွက်ပေးနေသည့် ရန်ကုန်တိုင်းရွှေလုပ်ငန်းရှင်အသင်းက စျေးကွက်အတွင်းရွှေကုန်ကြမ်းပြတ်လပ်မှုမရှိစေရန် မေ ၄ ရက်တွင်ဆွေးနွေးခဲ့သည်ဟုထုတ်ပြန်ချက်တွင်ဖော်ပြထားသည်။
ဗဟိုဘဏ်မှ ရွှေရောင်းချပေးရန်တင်ပြမည့်အပြင် ရွှေကုန်ကြမ်းပြတ်တောက်မူမရှိစေရန်အတွက် ပြည်ပတင်သွင်းမည်ဟုလည်းဆိုထားသည်။
ထိုအပြင် ရွှေဆိုင်နှင့် ရွှေကုန်လုပ်ငန်းရှင်များသည် ရန်ကုန်တိုင်းရွှေလုပ်ငန်းရှင်များအသင်းဖွင့်လှစ်သည့် ဈေးနှုန်းထက် ကျပ် ၅၀၀၀ သာခွာ၍ ရောင်းချရန်၊ နယ်မြေဖြတ်ကျော်မရောင်းချရန်လည်းအဆိုပါအသင်းကကန့်သတ်လိုက်သည်ဟုဆိုသည်။ ရွှေတွင်းလိုင်စင်ရှိသူများနှင့်ရွှေရောင်ဝယ်ကြရန်လည်းဆုံးဖြတ်သည်ဟုဆိုသည်။ထိုကြောင့်စစ်ကောင်စီလက်အောက်တွင် ရွှေတွင်းလိုင်စင်ရ ပုဂ္ဂိုလ်များမှာ စစ်ကောင်စီကိုအခွန်ပေးဆောင်နေကြရသည်ဖြစ်၍ စစ်ကောင်စီအတွက်ငွေရအောင် အသင်းကကြိုးစားနေခြင်းဖြစ်သည်ဟု ရွှေလုပ်ငန်းရှင်တစ်ဦးကလည်းပြောသည်။
Public Service Announcement
မေ ၂ ရက်တွင် အခေါက်ရွှေတစ်ကျပ်သားကို ကျပ်သိန်း ၂၀အောက်ကို စတင်ကျဆင်းခဲ့သည်။ သို့သော်လည်း ရန်ကုန်မြို့ရှိ ရွှေဆိုင်များက အခေါက်ရွှေနှင့် ရွှေအထည်အကျစ်ထည်များကို ရောင်းချခြင်းမရှိတော့ကြောင်း ရွှေဝယ်သူများကပြောသည်။
‘“၁၅ ပဲရည်လို လက်ဝတ်ရတနာထည်တွေပဲရောင်းတယ်၊ ၁၆ပဲရည်ကို အခေါက်ရွှေတွေ၊ အကျစ်ထည်တွေကိုမရောင်းပေးဘူး။ နောက်ပြီး ရန်ကုန်အသင်းကသတ်မှတ်တဲ့ နှုန်းနဲ့လည်း ဘယ်မှာမှ ဝယ်လို့မရဘူး”ဟု မေ ၂ ရက်က ရွှေဝယ်ရန် လိုက်လံစုံစမ်းခဲ့သူတစ်ဦးကပြောသည်။
စစ်ကောင်စီက ရန်ကုန်တိုင်းရွှေလုပ်ငန်းရှင်အသင်းကို အသုံးပြုပြီးရွှေဈေးနှုန်းကိုကန့်သတ်နေခြင်းဖြစ်သည်ဟုရွှေရောင်းဝယ်နေသူတစ်ဦးကပြောသည်။
စစ်တပ်အာဏာသိမ်းပြီးနောက် ကျပ်ငွေတန်ဖိုးကျပြီး ရွှေနှင့်ဒေါ်လာဈေးနှုန်းများ စံချိန်တင်တက်ခဲ့ရာ ၂၀၂၁ စက်တင်ဘာ လတွင် အခေါက်ရွှေတစ်ကျပ်သားကို ၂၂သိန်းအထိ စံချိန်တင်မြင့်တက်ခဲ့သည်။
