ပြည်သူလူထု ခုခံတွန်းလှန်စစ်ကြောင့် ၁၁လ အတွင်း စစ်ကောင်စီတပ်သား ၁၃၀၀၀ ကျော်သေဆုံးခဲ့သည်ဟု အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ယနေ့ ထုတ်ပြန်သည်။
၂၀၂၁ ဇွန်လ ၁ရက်မှ ၂၀၂၂ ဧပြီ ၂၅ရက်အထိစုဆောင်းရရှိသည့် အချက်အလက်များအရ ပြည်သူ့ခုခံတွန်းလှန်စစ်အတွင်း စစ်ကောင်စီတပ်သား ၁၃၀၆၂ဦး သေဆုံးပြီး ၄၂၈၀ ဦး ဒဏ်ရာရရှိခဲ့သည်ဟု ဖော်ပြထားသည်။
၂၀၂၁ မေလ ၅ရက်တွင် ပြည်သူ့ကာကွယ်ရေးတပ်မတော်(PDF) ဖွဲ့စည်းတည်ထောင်လိုက်ကြောင်း ကြေညာခဲ့ပြီးနော်က ဒေသအသီးသီးရှိ PDF ရဲဘော်များအနေဖြင့် ပျောက်ကြားစစ်၊ လှုပ်ရှားစစ် တို့ဖြင့် ရန်သူအထိနာအောင် တိုက်ခိုက်နိုင်ခဲ့ကြောင်း ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ယနေ့ PDF တည်ထောင်မှု ကြေညာခြင်း တစ်နှစ်ပြည့် အမှာစကား၌ ထည့်သွင်း ပြောကြားခဲ့သည်။
စစ်ကောင်စီတပ်အနေဖြင့် တစ်နေ့တခြား အင်အားပြုန်းတီးနေသကဲ့သို့ စိတ်ဓာတ်အရလည်း ဖရိုဖရဲ ပြိုကွဲနေပြီဖြစ်ကြောင်း ဝန်ကြီးက ပြောကြားခဲ့ပြီး အဆိုပါအခြေအနေတွင် ရန်သူကို အနားမပေးဘဲ ပြည်သူ့ရှေ့မှောက် စစ်အာဏာရှင် များ ဒူးထောက်အညံခံရသည့် အချိန်အထိ အဆက်မပြတ် အရှိန်မြှင့် တိုက်ခိုက်ကြရန် ကာကွယ်ရေးဝန်ကြီးက မှာကြားခဲ့သည်။
Public Service Announcement
ပြည်သူလူထုအနေဖြင့် အာဏာသိမ်းစစ်ကောင်စီ လုပ်ရပ်များအပေါ် ငြိမ်းချမ်းစွာ ဆန္ဒထုတ်ဖော် ဆန့်ကျင်ခဲ့သော်လည်း အကြမ်းဖက်စစ်တပ်မှ လက်နက်အားကိုးဖြင့် ပြည်သူလူထုအား အကြမ်းဖက် ပစ်ခတ်သတ်ဖြတ်မှု။ ဖမ်းဆီးမှုများ ပြုလုပ်ခဲ့ရာ ဒေသအသီးသီးရှိ ပြည်သူလူထုများက ရရာလက်နက်စွဲကိုင်တော်လှန်ခဲ့သည်။
ထို့နောက် ပြည်သူ့ကာကွယ်ရေးတပ်မတော်ကို တည်ထောင်ခဲ့ရာ တစ်နှစ်တာကာလအတွင်း နိုင်ငံတစ်ဝှမ်း၌ တပ်ရင်း၊တပ်ဖွဲ့ပေါင်း (၂၅၇)ရင်းဖွဲ့စည်းနိုင်ခဲ့ကြောင်း၊ မြို့နယ်အခြေပြု ပြည်သူ့ကာကွယ်ရေးအဖွဲ့ (ပကဖ) များကိုလည်း မြို့နယ်ပေါင်း (၂၅၀)တွင် စနစ် တကျ ဖွဲ့စည်းနိုင်ခဲ့ကြောင်း ကာကွယ်ရေးဝန်ကြီးဌာနက အသိပေးထားသည်။ ထို့ပြင် ဒေသအခြေစိုက်ကာကွယ်ရေးအဖွဲ့များ၊ မြို့ပြပြောက်ကျား အဖွဲ့များ (၄၀၀)ကျော်နှင့်လည်း ဟန်ချက်ညီစွာ တိုက်ပွဲဖော်ဆောင်ရန် ချိတ်ဆက်နိုင်ခဲ့ပြီးဖြစ်သည်ဟု ဆိုသည်။
