မြလိပ်တောင်တွင်ဆန္ဒပြခဲ့သည့် လူငယ်များကို ဖမ်းဆီးပစ်သတ်ခဲ့ဟု စစ်ကောင်စီ သတင်းအမှားထုတ်လွှင့်

မန္တလေးတိုင်း၊ ကျောက်ဆည်ခရိုင်၊ စဉ့်ကိုင်မြို့နယ် ဒုဌဝတီမြစ်ကမ်းဘေး အမြင့်ပေ(၃၀၀၀)ကျော်ရှိသည့် မြလိပ်တောင်ထိပ်တွင် စစ်အာဏာရှင်ဆန့်ကျင်ရေး စာတန်းချိတ်ဆွဲခဲ့သည့် လူငယ်များကို ဖမ်းဆီးသတ်ပစ်ခဲ့ကြောင်းစစ်ကောင်စီဝါဒဖြန့်မီဒီယာများက ယနေ့ (မေလ ၇)သတင်းအမှားများ ထုတ်လွှင့်ခဲ့သည်။

ယမန်နေ့ (မေလ ၆ ရက်)က ယင်းစာသားချိတ်၍ ဆန္ဒပြရန်ကြိုးပမ်းသည့် လူငယ်အမျိုးသား ​လေးဦးနှင့် အမျိုးသမီးနှစ်ဦးတို့ကို စစ်ကောင်စီဝင်များက ပစ်ခတ်ခဲ့ရာ နှစ်ဦးသေဆုံးပြီး​လေးဦး ဖမ်းမိခဲ့ကြောင်း အကြမ်းဖက်စစ်အုပ်စုက သတင်းအမှားများ ဖြန့်ဝေနေခြင်း ဖြစ်သည်။

အဆိုပါ ဝါဒဖြန့်သတင်းမှာ သတင်းအမှားသာဖြစ်ပြီး မန္တလေးသပိတ်အဖွဲ့ဝင် အားလုံးဘေးကင်းကြောင်း သပိတ်ကော်မတီဝင်တစ်ဦးက ​ပြောသည်။

“ကျွန်တော်တို့က စာတန်းချိတ်ပြီးပြန်ရောက်မှ ပုံတွေတင်တာပါ။ သူတို့က စာတန်းကို တက်ဖြုတ်ပြီး အောက်ရောက်မှ ပုံအတုတွေနဲ့ သတင်းမှားတွေ ဝါဒဖြန့်တာပါ။ ပုံထဲက သူတွေက ဘယ်သူတွေမှန်းတော့ မသိပါဘူး။ ဒါပေမယ့် ကျွန်တော်တို့ သပိတ်ကော်မတီဝင် အားလုံး ဘေးကင်းပါတယ် “ဟု ၎င်းက ပြောသည်။

Public Service Announcement

မန္တလေးသပိတ်အင်အားစုအဖွဲ့ဝင်များသည် ပြီးခဲ့သည့် မေလ ၃ ရက်ကလည်း မြလိပ်တောင် အမြင့်ဆုံးထိပ်နေရာတွင် “ပြည်သူနဲ့ဆန့်ကျင်ဘက်မှာ ဘယ်ကောင်နေရဲလဲ”၊ “မင်းတို့ကြောက်တဲ့ကြွေးကြော်သံတွေ နေရာတိုင်းမှာပြန့်စေရမယ်” ၊ “လုံးဝအုပ်ချုပ်ခွင့်မရစေရ”၊ “Myanmar Military Dictatorship Must Fail” ဆိုသည့် စာတန်းကို ပေ(၃၀)ကျော် အရှည်ရှိသည့် အဝတ်စ အနီရဲရဲပေါ်၌ စာလုံးအဖြူများဖြင့် ရေးသားကာ ချိတ်ဆွဲခဲ့ခြင်းဖြစ်သည်။