CDF-KKGမှ တစ်ဆင့် CDMပြုလုပ်သည့် စစ်သားနှင့်ရဲ ရှစ်ဦးအထိရှိလာ
ဂန့်ဂေါမြို့နယ်အတွင်း ယာယီတွဲဖက်တာဝန်ထမ်းဆောင်နေသည့် ရဲတပ်သားတစ်ဦးသည် စစ်ကောင်စီလက်အောက်မှ ရုန်းထွက်ပြီး လက်နက်နှင့်အတူ အလင်းဝင်လာကြောင်း ချင်းကာကွယ်ရေးတပ်-လေး၊ကဘော်၊ ဂန့်ဂေါ(CDF-KKG) က သတင်းထုတ်ပြန်သည်။
လောင်းရှည်နယ်မြေရဲစခန်းမှ ဂန့်ဂေါမြို့တွင် ယာယီတွဲဖက်တာဝန်ထမ်းဆောင်နေသည့် ရဲတပ်သား အောင်ကျော်လင်းသည် အာဏာသိမ်းစစ်ကောင်စီ၏ မတရားမှုများကို ဆန့်ကျင်ပြီး လက်နက်အပြည့်အစုံနှင့်တကွ အလင်းဝင်ရောက်လာ၍ ဆုကြေးငွေများ ချီးမြှင့်ပြီး လွတ်မြောက်နယ်မြေသို့ ပို့ဆောင်ပေးခဲ့သည်ဟု ဖော်ပြထားသည်။
ရဲတပ်သား အောင်ကျော်လင်းသည် M22 မောင်းပြန်သေနတ်တစ်လက်၊ ကျည်အိမ်အပိုတစ်ခုနှင့် ကျည် (၉၁) ထောင့်တို့ကို တပါတည်းယူဆောင်လာခဲ့သည်ဟု ဆိုသည်။
Public Service Announcement
ထို့ကြောင့် CDF-KKG မှတစ်ဆင့် CDMပြုလုပ်ပြီး အလင်းဝင်ရောက်လာသည့် စစ်သားနှင့် ရဲ စုစုပေါင်း ရှစ်ဦးထိရှိလာကြောင်း အသိပေးထားသည်။
လက်နက်/ကျည်အပြည့်အစုံဖြင့် အလင်းဝင်ရောက်လာသူများကိုသာ လုံခြုံစိတ်ချရသော နယ်မြေသို့ ပို့ဆောင်ပေးသွားမည်ဖြစ်ပြီးထိုက်သင့်သော ဆုကြေးကိုလည်း ချီးမြှင့်သွားမည် ဖြစ်ကြောင်း CDF-KKG က ထုတ်ပြန်ထားပြီး လက်နက်/ကျည်မပါသူများကို တာဝန်ယူမည် မဟုတ်ဟု အသိပေးထားသည်။
