▪️မြန်မာပြည်သူများနှင့် အတူရပ်တည်ပြီး ဆက်လက်ကူညီထောက်ပံ့မည်ဟု မလေးရှားကတိပြု
မြန်မာပြည်သူများနှင့်အတူ ခိုင်မာစွာရပ်တည်ပြီး ကူညီထောက်ပံ့မှုများဆက်လက်ပေးမည်ဟု မလေးရှားနိုင်ငံခြားရေးဝန်ကြီး Saifuddin Abdullah က ကတိပြုပြောကြားသည်။
ဝါရှင်တန်သို့ ရောက်ရှိနေသော အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်နှင့် မလေးရှားနိုင်ငံခြားရေးဝန်ကြီးတို့ လူချင်း ယနေ့တွေ့ဆုံခဲ့ပြီး မြန်မာပြည် ငြိမ်းချမ်းရေးနှင့် ဒီမိုကရေစီ ပြန်လည်ရရှိရေး ဆက်လက်လုပ်ဆောင်ရန် မလေးရှားက အသင့်ရှိကြောင်း ထည့်သွင်းဆွေးနွေးသည်။
တွေ့ဆုံစဥ် မြန်မာနိုင်ငံ၏ နောက်ဆုံးအခြေအနေများအပေါ် အမြင်ချင်းဖလှယ်ဆွေးနွေးခဲ့ပြီး မြန်မာဒုက္ခသည်များအတွက် လူသားချင်းစာနာမှုအကူအညီ၊ နည်းပညာသင်တန်းနှင့် ပညာရေး အပါအဝင် NUG ရင်ဆိုင်နေရသော စိန်ခေါ်မှုများကို ဝန်ကြီးဒေါ်ဇင်မာအောင်က မျှဝေခဲ့ကြောင်း မလေးရှားနိုင်ငံခြားရေးဝန်ကြီးက ၎င်း၏ လူမှုကွန်ရက်၌ ရေးသားထားသည်။
Public Service Announcement
NUG နိုင်ငံခြားရေးဝန်ကြီး ဒေါ်ဇင်မာအောင်သည် အမေရိကန်-အာဆီယံထိပ်သီးညီလာခံကျင်းပနေချိန်တွင် ဝါရှင်တန်သို့ ရောက်ရှိနေခြင်းဖြစ်ပြီး အမေရိကန် နိုင်ငံခြားရေး ဒုတိယဝန်ကြီး ဝင်ဒီရှားမန်း၊ သမ္မတဂျိုးဘိုင်ဒန်၏ လူ့အခွင့်အရေးဆိုင်ရာဝန်ကြီး၊ အာဆီယံဝန်ကြီးအချို့နှင့် လူချင်းတွေ့ဆုံဆွေးနွေးခဲ့သည်။
မလေးရှားနိုင်ငံခြားရေးဝန်ကြီးသည် အာဆီယံအနေဖြင့် NUG ၊ NUCCအပါအဝင် ပါဝင်သင့်သူများနှင့် ထိတွေ့ဆက်ဆံရန် အဆိုပြုထားသည်။
