စစ်ကောင်စီက ရွှေလုပ်ငန်းရှင် ကိုး ဦးခန့်ကို ယနေ့ ဖမ်းဆီးလိုက်ကြောင်းရွှေလုပ်ငန်းရှင်များထံမှသိရသည်။
မည့်သည့် အကြောင်းပြချက်ဖြင့် ဖမ်းဆီးသည်ကို မသိရှိရသေးကြောင်းလည်း ရွှေလုပ်ငန်းရှင်များကပြောသည်။
သိုသော်ဖမ်းဆီးခံရသူများထံမှရွှေလုပ်ငန်းရှင်တစ်ဦးကို အိန္ဒိယသို့ စစ်ကောင်စီ၏ ခွင့်ပြုချက်မရဘဲ ရွှေမှောင်ခိုတင်ပို့ခြင်းကြောင့်ဟုစွပ်စွဲကာဖမ်းဆီးခြင်းဖြစ်ကြောင်း ရွှေလုပ်ငန်းရှင်တစ်ဦးကပြောသည်။
အဖမ်းခံရသည့် ရွှေလုပ်ငန်းများသည် ရန်ကုန်တိုင်းရွှေလုပ်ငန်းရှင်များအသင်းဝင်များဖြစ်သည်ဟုလည်း သိရသည်။ အဆိုပါအသင်းသည်အကြမ်းဖက်စစ်တပ်က အာဏာသိမ်းပြီးနောက်ပိုင်း စစ်ကောင်စီအလိုကျ ရွှေဈေးထိန်းချုပ်ခြင်း၊ဈေးကွက်ထိန်းချုပ်ခြင်းကို တက်ကြွစွာဆောင်ရွက်ပေးနေသည့် အသင်းဖြစ်ကြောင်းလည်းရွှေလုပ်ငန်းရှင်များကပြောသည်။
Public Service Announcement
ရွှေလုပ်ငန်းရှင်အချို့ အားဖမ်းဆီးသည့် သတင်းကိုအပြင်မပေါက်ကြားစေရန် စစ်ကောင်စီက ရွှေလုပ်ငန်းရှင်များနှင့် ဖမ်းဆီးခံရသူမိသားစုများကို ခြိမ်းခြောက်ထားကြောင်းလည်းစုံစမ်းသိရသည်။
ရန်ကုန်တိုင်းရွှေလုပ်ငန်းရှင်များအသင်းရုံးတွင် ရွှေဈေးကွက်နှင့်ဈေးနှုန်းတည်ငြိမ်စေရန်ယနေ့ဆွေးနွေးခဲ့ကြောင်းအသင်း၏ ဖေစ်ဘွခ်တွင် မွန်းလွှဲတစ်နာရီကျော်တွင်သတင်းထုတ်ပြန်သည်။လုပ်ငန်းရှင်အချို့ဖမ်းဆီးခံရမှုမှာအဆိုပါအစည်းအဝေးမတိုင်ခင်လား၊ အစည်းအဝေးပြီးမှလားဆိုသည်ကိုမူ မသိ့ရသေးပေ။ မေလ ၁၆ ရက် ရန်ကုန်တိုင်းရွှေလုပ်ငန်းရှင်အသင်းကဖွင့်သောရွှေဈေးမှာအကယ်ဒမီမင်းလင်းရွှေတစ်ကျပ်သားလျှင် ၂၀၃၅၀၀၀ ကျပ်(နှစ်ဆယ်သိန်းသုံးသောင်းငါးထောင်ကျပ်)ဖြစ်သည်။
ယခုရက်ပိုင်းတွင် ရွှေအသင်းကဖွင့်သောရွှေဈေးမှာ ပြင်ပအမှန်တစ်ကယ်ပေါက်ဈေးထက်နည်းနေပြီး ဆိုင်များတွင် ထိုနှုန်းဖြင့်ဝယ်ယူရန်ခက်ခဲသည်။
မည်သည့်အကြောင်းဖြင့်ဖြစ်စေရွှေဈေးတက်လျှင်စစ်ကောင်စီက လုပ်ငန်းရှင်များကိုဖမ်းဆီးခြင်း၊ခေါ်ယူစစ်ဆေးခြင်း၊ခြိမ်းခြောက်ခြင်းစသောနည်းလမ်းများဖြင့်ဈေးကျအောင်လုပ်လေ့ရှိကြောင်းလုပ်ငန်းရှင်အချို့ကပြောသည်။
