လုပ်ငန်းရှင်ကြီးများကို တရားဝင်စာပို့အခွန်ကောက်ခံသွားမည်ဟု NUG ဝန်ကြီးပြော

နွေဦးတော်လှန်ရေးအတွက် လုပ်ငန်းရှင်ကြီးများက အခွန်ပေးဆောင်ပါဝင်ထားခြင်းမရှိသော ကြောင့် တရားဝင်စာပို့ပြီး အခွန်ကောက်ခံသွားမည်ဟု အမျိုးသားညီညွတ်ရေးအစိုးရ(NUG)၏ စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီး ဦးတင်ထွန်းနိုင်က ပြောကြားသည်။

NUGက အခွန်ကောက်ခံရာတွင် သာမာန်လုပ်ငန်းရှင်များကသာ အမေရိကန်ဒေါ်လာ ၅သောင်း၊ တစ်သိန်းအထိ အခွန်ပေးဆောင်ထားပြီး လုပ်ငန်းရှင်ကြီးများက အခွန်ပေးဆောင်ခြင်းမရှိဟု ၎င်းက ဆိုသည်။

“လုပ်ငန်းရှင်ကြီးတွေထက် လုပ်ငန်းရှင်တွေဆောင်ကြတယ်၊ တကယ့်လုပ်ငန်းရှင်ကြီးတွေအဆင့်မဟုတ်ဘူး။ သူတို့က အများဆုံးဆောင်တာ ဒေါ်လာ ၅သောင်း၊ အများဆုံးက ဒေါ်လာတသိန်းဆောင်တဲ့သူရှိတယ်။ ဒါပေမယ့် တစ်ယောက်တည်းရှိသေးတယ်”ဟု ဦးတင်ထွန်းနိုင်က ပြောသည်။

အခွန်ဆောင်သည့်လုပ်ငန်းရှင်များတွင် သာမာန်စတိုးဆိုင်ပိုင်ရှင်အဆင့်များသာ ဖြစ်သည်ဟုလည်း ၎င်းက ဆိုသည်။ ထိုကြောင့် လုပ်ငန်းရှင်ကြီးများအနေဖြင့် NUGကို တရားဝင်အခွန်ဆောင်ရန် စာပေးပို့သွားမည်ဟု ဦးတင်ထွန်းနိုင်က ပြောသည်။

Public Service Announcement

နွေဦးတော်လှန်ရေးအတွက် ဘဏ္ဍာငွေကို နွေဦးထီးရောင်းချခြင်း၊ ငွေတိုက်စာချုပ်များ ရောင်းချခြင်း၊ အခွန်ကောက်ခံခြင်းနှင့် အကြမ်းဖက်စစ်ခေါင်းဆောင်ပိုင်ဆိုင်သည့် အိမ်နှင့်မြေကွက်များကိုရောင်းချခြင်းတို့ အဓိက ရှာဖွေနေခြင်းဖြစ်သည်။

ထို့အပြင် ပြည်တွင်း၊ ပြည်ပရှိ ပြည်သူများ၏ လှူဒါန်းငွေများမှာလည်း အဓိက ရရှိနေသည်။

လက်ရှိတွင် ငွေတိုက်စာချုပ်ရောင်းချခြင်းမှ ကန်ဒေါ်လာ ၃၇သန်း၊ စစ်ခေါင်းဆောင်မင်းအောင်လှိုင် မတရားသိမ်းယူထားသည့် ရန်ကုန်မြို့ အင်းယားလမ်းရှိ အိမ်နံပတ်(၁၄) ရောင်းချရာတွင် ရရှိထားသည့် ဒေါ်လာ ၇သန်းတို့ရရှိထားသည်။