မိုးဗြဲမြို့အနီးရှိ ၊ဝှါရီဆူးပလိုင်ကျေးရွာမှ စစ်ဘေးရှောင်ပြည်သူများ စားနပ်ရိက္ခာပြန်ယူနိုင်ရန် လုံခြုံရေးယူပေးစဥ် စစ်ကောင်စီတပ်နှင့် တိုက်ပွဲဖြစ်ပွားခဲ့ကြောင်း မိုးဗြဲပြည်သူ့ကာကွယ်ရေးတပ်- MBPDF က ထုတ်ပြန်သည်။
ရွာခံပြည်သူများသည် စစ်ဘေးရှောင်နေရသည့်ကာလ ကြာလာသည်နှင့်အမျှ အစားအသောက်များခက်ခဲလာသောကြောင့် ၎င်းတို့၏ နေအိမ်များသို့ စားနပ်ရိက္ခာများပြန်ယူလိုကြောင်း အကူ အညီတောင်းခံလာသည့်အတွက် မိုးဗြဲ ပြည်သူ့ကာကွယ်ရေးတပ်မှ ပြည်သူများ၏ လုံခြုံရေးအဖြစ် လိုက်ပါဆောင်ရွက်ခဲ့သည်ဟု ဆိုသည်။
ထိုသို့လုံခြုံရေးယူပေးနေစဥ် ယမန်နေ့(မေ ၂၂ ရက်) ညနေ ၄ နာရီခန့်တွင် ဝှါရီဆူးပလိုင်ရွာအ တွင်း တပ်စွဲထားသော စစ်ကောင်စီတပ်များနှင့် မိနစ် ၃၀ခန့် ထိတွေ့တိုက်ပွဲဖြစ်ပွားခဲ့ကြောင်း အသိပေးသည်။
တိုက်ပွဲဖြစ်ပွားနေစဥ် စစ်ကောင်စီတပ်ဘက်မှ ထိခိုက် ကျဆုံးမှုများရှိနိုင်ပြီး အရေအတွက်ကို အတည်မပြုနိုင်သေးပေ။
Public Service Announcement
MBPDF တပ်ဘက်မှ ရဲဘော်တစ်ဦး အသေးစား(မစိုးရိမ်ရ)ဒဏ်ရာသာရရှိခဲ့ပြီးပြန်လည် ဆုတ်ခွာလာနိုင်ခဲ့သည့်အပြင် ပြည်သူများသည်လည်း လိုအပ်သည့်ရိက္ခာများကို အချိန်မီယူဆောင်နိုင်ခဲ့ကြောင်း ထုတ်ပြန်ချက်၌ ဖော်ပြသည်။
“ဝှါရီဆူးပလိုင်က စစ်တပ်တပ်စွဲထားတော့ ဒေသခံတွေ မနေရဲလို့ ရွာလုံးကျွတ်စစ်ဘေးရှောင်နေရတာ။အခုက စစ်ဘေးရှောင်ပြည်သူတွေဆီမှာ စားနပ်ရိက္ခာလည်း ရှားပါးလာတော့ အသက်စွန့်ပြီး ရွာထဲရသမျှ သွားယူနေရတဲ့ မခြေအနေဖြစ်နေတယ်။ပြီးတော့ ရာသီတုပ်ကွေး ကလည်း စနေပြီ”ဟု Mobye Rescue Team တာဝန်ရှိသူက လူထုနွေဦးသို့ ပြောသည်။
လက်ရှိ ရှမ်းနှင့် ကယား(ကရင်နီ)ပြည်နယ် ဒေသအစပ် ဖယ်ခုံ၊မိုးဗြဲ တို့တွင် တိုက်ပွဲများ ဖြစ် ပွားနေပြီး စစ်ဘေးရှောင်ပြည်သူများ၏ အရေးပေါ်စားနပ်ရိက္ခာနှင့် ဆေးဝါးမှာ လိုအပ်ချက် မြင့်မားနေသည်ဟု ကူညီကယ်ဆယ်ရေးအဖွဲ့များ ထုတ်ပြန်ထားသည်။
