ကေအဲန်ယူ-ညောင်လေးပင်ခရိုင် တပ်မဟာ ၃ နယ်မြေ မုန်းမြို့နယ်အတွင်းရှိ ကျေးရွာနေပြည်သူလူထုတွေအနေနဲ့ မူးယစ်ဆေးဝါးနဲ့လောင်းကစားမှုတွေကို လုံး၀မပြုလုပ်ဖို့ အချက်တွေအပါအဝင် အချက်(၆)ချက်ပါတဲ့ ညွှန်ကြားချက်တစ်ရပ်ကို ပြည်သူတွေလိုက်နာဆောင်ရွက်ဖို့ ကေအဲန်ယူ-မုန်းမြို့နယ်က မေလ ၂၁ ရက် ရက်စွဲနဲ့ထုတ်ပြန်အသိပေးခဲ့ပါတယ်။
ကေအဲန်ယူ-မုန်းမြို့နယ်ဟာ ကေအဲန်ယူဗဟို ခရိုင်က ချမှတ်ထားတဲ့ မူဝါဒစည်းမျဉ်းစည်းကမ်းတွေအပေါ် ရပ်တည်အကောင်အထည်ဖော် ဆောင်ရွက်ရတာနဲ့အညီ မိမိစီမံအုပ်ချုပ်တဲ့နယ်မြေအတွင်းရှိ ပြည်သူလူထုတွေရဲ့ စားဝတ်နေရေး လူမှုရေးနဲ့ လူမှုဘ၀လိုအပ်ချက်တွေကို ပြည်သူနဲ့အတူ လက်တွဲဆောင်ရွက်လျက်ရှိပြီး ပြည်သူတွေရဲ့ လူမှုဘ၀လုံခြုံရေး နယ်မြေလုံခြုံရေးနဲ့ တရားဥပဒေစိုးမိုးရေး နယ်မြေတည်ငြိမ်အေးချမ်းရေးအတွက် ဆောင်ရွက်လျက်ရှိတာကြောင့် ပြည်သူလူထုတစ်ရပ်လုံးအနေနဲ့ ထုတ်ပြန်ထားတဲ့ညွှန်ကြားချက်တွေကို လိုက်နာဆောင်ရွက်ဖို့ အသိပေးထားတာပါ။
ပြည်သူလူထုတွေအနေနဲ့ ကေအဲန်ယူ-မုန်းမြို့နယ် စီမံအုပ်ချုပ်မှုနယ်မြေတွေအတွင်းမှာ ဆောင်ရွက်လိုတဲ့ ဘယ်ကိစ္စကိုမဆို သက်ဆိုင်ရာမြို့နယ်ခွင့်ပြုချက်ကို ရယူပြီး သက်ဆိုင်ရာက သတ်မှတ်ထားတဲ့ စည်းမျဉ်းစည်းကမ်းတွေနဲ့အညီ လိုက်နာဆောင်ရွက်ရမှာဖြစ်ကာ ပညာရေး ကျန်းမာရေး လူမှုရေးကိစ္စနဲ့ စီးပွားရေး ဒေသဖွံ့ဖြိုးရေးလုပ်ငန်းတွေ ဆောင်ရွက်လုပ်ကိုင်လိုပါက ကေအဲန်ယူ-မုန်းမြို့နယ်ထံ တရားဝင်တင်ပြတောင်ခံပြီး ခွင့်ပြုချက်ရမှာသာ လုပ်ကိုင်ဆောင်ရွက်ရမယ်လို့ ဖော်ပြထားပါတယ်။
ဒါ့အပြင် မြို့နယ်အတွင်းက ဒေသခံပြည်သူလူထုတွေဟာ မိမိတို့ပိုင်ဆိုင်မှုမှန်သမျှကို တရားဝင်အသိအမှတ်ပြုနိုင်ဖို့အတွက် ကေအဲန်ယူ-မုန်းမြို့နယ်ရုံးမှာ တရားဝင်စာရင်းသွင်းမှတ်ပုံတင်ရပြီး မြေယာ၊ သစ်တော၊ ရေလုပ်ငန်းနဲ့ သဘာ၀သယံဇာတွေကို ဆောင်ရွက်လိုပါက ကေအဲန်ယူ-မုန်းမြို့နယ်နဲ့ သက်ဆိုင်ရာဌာနတွေရဲ့ သတ်မှတ်ထားတဲ့လုပ်ထုံလုပ်နည်းနဲ့အညီ လုပ်ကိုဆောင်ရွက်ရမယ်လို့ ဆိုထားပါတယ်။
ဆက်လက်ပြီး ပြည်သူလူထုတွေအနေနဲ့ မြို့နယ်အတွင်းမှာ မူးယစ်ဆေးဝါးနဲ့ လောင်းကစားတွေကို လုံး၀မပြုလုပ်ဖို့၊ အများပြည်သူလက်ရှိရင်ဆိုင်နေရတဲ့ ကိုဗစ်ကပ်ရောဂါ ထိန်းချုပ်ကာကွယ်နိုင်ဖို့အတွက် ကေအဲန်ယူ-မုန်းမြို့နယ် ကျန်းမာရေးနဲ့ ကယ်ဆယ်ရေးဌာနရဲ့ လမ်းညွှန်မှုအတိုင်း လိုက်နာဆောင်ရွက်ဖို့ အသိပေးထားသေးတာပါ။
Public Service Announcement
အဆိုပါညွှန်ကြားချက်တွေကို မြို့နယ်အတွင်းရှိ ပြည်သူလူထုတစ်ရပ်လုံးအနေနဲ့ တိကျစွာလိုက်နာရမှာဖြစ်ပြီး ဖောက်ဖျက်ကျူးလွန်းပါက ကေအဲန်ယူက ချမှတ်ထားတဲ့ စည်းမျဉ်းဥပဒေနဲ့အညီ ထိရောက်စွာအရေးယူသွားမယ်လို့ ကေအဲန်ယူ-မုန်းမြို့နယ်က အသိပေးထုတ်ပြန်ထားတာဖြစ်ပါတယ်။
