နယ်မြေရှင်းလင်းစဥ် ထိတွေ့မှုထပ်ဖြစ်
ကနီနှင့် ယင်းမာပင်နယ်စပ်သို့ စစ်ကူနှင့် ထောက်ပို့လာသော စစ်ကောင်စီတပ်မှ ကားနှစ်စီးကို ချိုမိုင်မိုင် ယင်းမာပင်-ကနီမဟာမိတ်တပ်ပေါင်းစုက စောင့်ကြိုတိုက်ခိုက်ခဲ့ကြောင်း ယနေ့(မေ ၂၄)တွင် ထုတ်ပြန်သည်။
ယနေ့နံနက် ၆ နာရီခွဲက အနောက်မြောက်တိုင်းစစ်ဌာနချုပ်(နမခ)မှ ချင်းတွင်းတံအနောက်ဘက် တော်လှန်ရေးရဲဘော်များနှင့် တိုက်ပွဲဖြစ်ကာ အထိနာနေသော စစ်ကောင်စီတပ်ထံ ထောက်ပို့လာသော စစ်ကားနှစ်စီးကို တရော်ကျင်းနှင့် ဘန့်ဘွေးရွာကြားတွင် တိုက်ခိုက်ခဲ့ကြောင်း ဖော်ပြသည်။
ထိုတိုက်ခိုက်မှုတွင် စစ်ကောင်စီတပ်မှ ထိခိုက်သေဆုံးရှိနိုင်သော်လည်း အသေအပျောက်နှင့် ထိခိုက်စာရင်းအား အတိအကျမသိရသေးဟု ထုတ်ပြန်သည်။
Public Service Announcement
ယင်းနောက် နယ်မြေရှင်းလင်းရေးလုပ်ဆောင်စဥ် စစ်ကောင်စီတပ်ကင်းပုန်းနှင့်တိုးကာ နှစ်ဖက်အပြန်အလှန်ပစ်ခတ်မှု ထပ်မံဖြစ်ပွားခဲ့ကြောင်း အသိပေးသည်။
၎င်းထိတွေ့မှုတွင် စစ်ကောင်စီတပ်မှ ပစ်ခတ်သောကျည်မှာ ရဲဘော်တစ်ဦး၏ သေနတ်ဒင်အားထိမှန်ရာ လူထိခိုက်မှုမရှိဘဲ သေနတ်ဒင်သာပဲ့သွားခဲ့သည်ဟု ထုတ်ပြန်သည်။
ထိတွေ့တိုက်ပွဲတွင် ချိုမိုင်မိုင်အဖွဲ့မှ ရဲဘော်အားလုံး ဘေးကင်းခဲ့ပြီး စစ်ကောင်စီတပ်ဘက်မှ ထိခိုက်သေဆုံးရှိနိုင်ပြီး စာရင်းအတိအကျမသိရသေးကြောင်း ဖော်ပြသည်။
ချိုမိုင်မိုင်အဖွဲ့အနေဖြင့် အကြမ်းဖက်စစ်ကောင်စီတပ်နှင့်ယှဥ်ရာတွင် လက်နက်အင်အားမမျှတသော်လည်း စိတ်ခွန်အားတစ်ခုတည်းဖြင့်သာတော်လှန်နေပြီး လက်နက်ခဲယမ်းဝယ်ယူနိုင်ရေးအတွက် ကူညီပေးကြရန် မေတ္တာရပ်ခံထားသည်။
