စစ်တပ်အာဏာသိမ်းပြီးနောက် စစ်ကောင်စီ၏ သတ်ဖြတ်ခံရမှုနှင့်စစ်ဘေးရှောင်နေစဥ် ဆေးဝါးနှင့် စားနပ်ရိက္ခာမလုံလောက်၍ ကရင်နီပြည်နယ်၌ သေဆုံးခဲ့ရသော အရပ်သားပြည်သူ ၂၆၃ဦးထက်မနည်းရှိကြောင်း တိုးတက်သောကရင်နီပြည်သူ့အင်အားစု(PKPF)က ထုတ်ပြန်သည်။
အဆိုပါ သေဆုံးမှုအရေအတွက်သည် ၂၀၂၁ ဖေဖော်ဝါရီ ၁ ရက်မှ ယနေ့( မေလ ၂၈ရက်)အထိဖြစ်ပြီး လွိုင်ကော်၊ဒီးမော့ဆို၊ဖရူဆို၊ဖယ်ခုံနှင့် ဘောလခဲမြို့နယ်မှ ဒေသခံများ ဖြစ်သည်။
စစ်ကောင်စီ၏ အကြောင်းမဲ့သတ်ဖြတ်မှုနှင့် လက်နက်ကြီးဖြင့် ရမ်းသမ်းပစ်ခတ်မှုကြောင့် သေဆုံးခဲ့ရသော အရပ်သားပြည်သူစာရင်းအရ ဒီးမော့ဆိုမြို့နယ်တွင် ၈၃ဦး၊လွိုင်ကော် ၇၄ဦး၊ ဖရူဆို ၄၆ဦး၊ဖယ်ခုံ ၃၁ဦးနှင့် ဘောလခဲမှ ငါးဦးသေဆုံးခဲ့သည်။
ထို့အတူ စစ်ဘေးရှောင်စဥ် သေဆုံးခဲ့သည့် ပြည်သူများအနက် ဒီးမော့ဆိုမြို့နယ်မှ ၁၅ဦး၊လွိုင်ကော်မှ လေးဦးနှင့် ဖယ်ခုံမြို့နယ်မှ ငါးဦးတို့ ပါဝင်သည်။
ထို့အပြင် အဆိုပါ အရေအတွက်ထက် မြေပြင်တွင် ယခုထက်ပိုနိုင်ကြောင်းလည်း PKPF က အသိပေးသည်။
“ပြီးခဲ့တဲ့ နှစ်ရက်ကပဲ ဒီးမော့ဆိုထဲက ဟိုဝမ် စစ်ရှောင်မှာ ခြောက်လကလေးတစ်ယောက် ဆုံးသွားရတယ်။အဓိကတော့ ရေသန့်ရှားတယ်။ပြီးတော့ ဆေးတွေကိုလည်း ကျွန်တော်တို့ဆီ တင်သွင်းခွင့်ကို အကြမ်းဖက်စစ်တပ်က ပိတ်ထားတယ်။အခုဆို မိုးတွင်းပါရောက်လာပြီဆိုတော့ စစ်ရှောင်စခန်းတွေမှာ သွေးလွန်တုပ်ကွေးက စိုးရိမ်စရာအခြေအနေရှိတယ်”ဟု ကရင်နီစစ်ဘေးရှောင် ကူညီစောင့်ရှောက်ပေးနေသူ တာဝန်ရှိသူက People’s Springသို့ ပြောသည်။
လက်ရှိတွင်လည်း အကြမ်းဖက်စစ်ကောင်စီတပ်က ကရင်နီ(ကယား)ပြည်နယ်တွင် စစ်အင်အားတိုးချဲ့နေပြီး မကြာသေးမီရက်ပိုင်းကပင် ဖယ်ခုံမြို့ရှိ ပြည်သူ့နေအိမ်များကို ရွာလုံးကျွတ်မီးရှို့ ခဲ့သည်။
ထို့ကြောင့် ဖယ်ခုံ၊မိုးဗြဲ မြို့နယ် စာရင်းအပါ ကရင်နီပြည်နယ်တွင် စစ်ဘေးရှောင်ပြည်သူ အရေအတွက်မှာ ၁၇၀,၀၀၀ ထက်မနည်းရှိနေကြောင်း ဒေသခံလူမှုအဖွဲ့အစည်းများက ထုတ်ပြန်ထားသည်။