ကချင်ဒေသတွင် လက်နက်ခဲယမ်းများစွာဖြင့် ပြည်သူ့ဘက်ရပ်တည်လာခဲ့သော စစ်ကောင်စီတပ်မှ အရာရှိတစ်ဦးနှင့် တပ်သားတစ်ဦးတို့ကို ပြည်သူ့ပန်းတိုင်က ငွေကျပ် ၃၂ သိန်း ဂုဏ်ပြုချီးမြှင့်ကြောင်း ယနေ့သတင်းထုတ်ပြန်သည်။
စစ်ကောင်စီတပ်၏ မတရားသောအမိန့်၊ တာဝန်များကို ဆက်လက်တာဝန်မထမ်းဆောင်လိုသော အထက်ပါအရာရှိနှင့်တပ်သားတို့သည် ပြည်သူ့ပန်းတိုင်အဖွဲ့နှင့် ချိတ်ဆက်ကာ လွတ်မြောက်နယ်မြေတစ်ခုသို့ စစ်ဘက်သုံးလက်နက်များစွာဖြင့် ပြည်သူ့ဘက်သို့ ပူးပေါင်းပါဝင်လာခဲ့ ခြင်းဖြစ်သည်။
၎င်းတို့သည် MA-2 သေနတ်တစ်လက်၊ MA-3 သေနတ်တစ်လက်၊ MA-5 ပစ္စတိုသေနတ်အတိုတစ်လက်အပါအဝင် ခဲယမ်းများစွာဖြင့် အကြမ်းဖက်စစ်ကောင်စီတပ်ကို စွန့်ခွာခဲ့ ခြင်းဖြစ်သည်။
လက်ရှိအချိန်ထိ အကြမ်းဖက်စစ်ကောင်စီတပ်၏ မတရားသောအမိန့်၊ တာဝန်များအောက်တွင် ဆက်လက်တာဝန်ထမ်းဆောင်လိုခြင်း မရှိတော့သည့်အတွက် ကချင် လွတ်မြောက်နယ်မြေ စခန်းတစ်ခု၌ လက်နက်ဖြင့် ပြည်သူ့ဘက်ကူးပြောင်းရပ်တည်ထားသူ ၁၁ ဦးခန့်ရှိနေသည်ဟု ပြည်သူ့ပန်းတိုင်အဖွဲ့က ထုတ်ပြန်သည်။
အဆိုပါပြည်သူ့ဘက်ရပ်တည်လာသူများကို ဂုဏ်ပြုထောက်ပံ့လိုပါက ပြည်သူ့ပန်းတိုင်အဖွဲ့သို့ ဆက်သွယ်နိုင်ကြောင်းနှင့် ထပ်မံ၍ ပြည်သူ့ဘက်ကူးပြောင်းရပ်တည်လိုပါက ပြည်သူ့ပန်းတိုင်အဖွဲ့https://www.facebook.com/myanmarspring2022/ ကိုယုံကြည်စွာဆက်သွယ်
မေးမြန်း တိုင်ပင်နိုင်ကြောင်းထုတ်ပြန်သည်။
ပြည်သူ့ပန်းတိုင်အဖွဲ့သည် NUG-MOD ၊ တိုင်းရင်းသားတော်လှန်ရေး တပ်ဖွဲ့များ၊ တော်လှန်ရေးအင်းအားစုများဖြင့် သက်ဆိုင်ရာတိုင်းဒေသအလိုက် ပူးပေါင်းကူညီဆောင်ရွက်နေသည်။
ထိုအပြင်ပြည်သူနှင့်ပူးပေါင်းလာသူများအတွက်လည်း ပြည်သူများအနေဖြင့် ဂုဏ်ပြုထောက်ပံ့လိုပါက ပြည်သူ့ပန်းတိုင်အဖွဲ့သို့ ဆက်သွယ်နိုင်ကြောင်းလည်းဖော်ပြထားသည်။
(ပြည်သူနှင့်ပူးပေါင်းလာသောစစ်သားနှစ်ဦးယူဆောင်လာသော လက်နက်ခဲယမ်းများနှင့် ၎င်းတို့နှစ်ဦးကိုဂုဏ်ပြုငွေပေးအပ်နေစဥ်။ ။ဓါတ်ပုံ-ပြည်သူ့ပန်းတိုင်)