အမျိုးသားညီညွတ်ရေးအစိုးရသည် ပြည်သူလူထုအတွက် တရားဥပဒေနှင့်အညီ ဝန်ဆောင်မှုပေးရန် “ပြည်သူ့ရဲတပ်ဖွဲ့”ကို ဖွဲ့စည်းလိုက်ကြောင်း ယာယီသမ္မတဒူဝါလရှီးလက ထုတ်ပြန်သည်။
အကြမ်းဖက်စစ်ကောင်စီ၏ ပြည်သူလူထုအပေါ် ကျူးလွန်သည့် အကြမ်းဖက်ရာဇဝတ်မှုများ၊ စစ်ရာဇဝတ်မှုများ၊ လူ့အခွင့်အရေးချိုးဖောက် မှုများနှင့်ပတ်သက်၍ တာဝန်ရှိသူများအား တရားဥပဒေနှင့်အညီ အရေးယူအပြစ်ပေးနိုင်ရန် ရည်ရွယ်ချက်များဖြင့် ပြည်သူ့ရဲတပ်ဖွဲ့ဥပဒေကို ရေးဆွဲခဲ့ပြီး ယင်းဥပဒေနှင့်အညီ ပြည်သူ့ရဲတပ်ဖွဲ့ကို ဖွဲ့စည်းခဲ့ခြင်းဖြစ်သည်ဟု ဖော်ပြသည်။
ထို့အပြင် ကြားကာလ တရားဥပဒေစိုးမိုးရေးကို ဖော်ဆောင်နိုင်ရန်၊ ဒုစရိုက်မှုများနှင့် တရားဥပဒေမဲ့ ပြုကျင့်သူများအား ပြည်သူလူထုနှင့် ပူးပေါင်း၍ တားဆီးရန်၊ ပြည်သူတစ်ရပ်လုံး ယုံကြည်လက်ခံသော ရဲတပ်ဖွဲ့ဖြစ်ပေါ်လာစေရန်အတွက်လည်း ရည်ရွယ်ဖွဲ့စည်းသည်ဟု ဖော်ပြသည်။
စစ်တပ်က အာဏာသိမ်းပြီးနောက်ပိုင်း CDM လှုပ်ရှားမှုတွင် ရဲတပ်ဖွဲ့ဝင် ၆,၀၀၀ ကျော်ပါဝင်ခဲ့ပြီး ပြည်သူ့ရဲ တပ်ဖွဲ့ဥပဒေရေးဆွဲရာတွင် အဆိုပါ CDM ရဲအရာရှိများ၊ အရာရှိဟောင်းများ၊ ဥပဒေကျွမ်းကျင်သူများ၊ NUG ပြည်ထဲရေးဝန်ကြီးဌာနမှ တာဝန်ရှိသူများက ပါဝင်ရေးဆွဲခဲ့ကြောင်း သိရသည်။
Public Service Announcement
