တာဝန်ထမ်းဆောင်စဥ် စစ်ကောင်စီနှင့် ပျူစောထီးများ၏ဖမ်းဆီးခြင်းခံရပြီး ဥပဒေမဲ့သတ်ဖြတ်မှုကြောင့် အခြားပြည်သူ ခြောက်ဦးနှင့်အတူအသက် ပေးလှူသွားသည့် ရဲဘော်ချမ်းကို နှင့် ရဲဘော် နန္ဒတို့အတွက် ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့(CHU PDF)က ဝမ်းနည်းကြောင်းသဝဏ်လွှာ ထုတ်ပြန်သည်။
ယမန်နေ့(ဇွန် ၇ ရက်)က ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့၊ ထုတ်လုပ်ရေးဌာနခွဲမှ ရဲဘော် ချမ်းကို၊ ရဲဘော်နန္ဒတို့သည် ဝယ်ယူရေးတာဝန်ထမ်းဆောင်ရင်း နံနက် ၇ နာရီခန့်တွင် ကံကြီးကုန်းပျူစောထီးရွာမှ ဖမ်းဆီးခြင်းကိုခံခဲ့ရ ခြင်းဖြစ်သည်။
ဥပဒေမဲ့သတ်ဖြတ်မှုကြောင့် အခြားပြည်သူ ခြောက်ဦးနှင့်အတူ ညနေပိုင်း၌ နိုင်ငံတော်အတွက်အသက်ပေးလှူ၍ မြင့်မြတ်စွာကျဆုံးခဲ့ရကြောင်း CHU PDF က ဆိုသည်။
စစ်အာဏာရှင်စနစ်အမြစ်ဖြတ်ချေမှုန်းရေးတွင် နိုင်ငံတော်နှင့်ပြည်သူ့အကျိုးစီးပွားအတွက်တိုက် ပွဲဝင်ရင်း ကျဆုံးခဲ့ရသဖြင့် မိသားစုနှင့်ထပ်တူထပ်မျှ ဆို့နင့်ကြေကွဲဝမ်းနည်းရသည်ဟု အသိပေးသည်။
Public Service Announcement
ကျဆုံးအာဇာနည်ရဲဘော်များဆောင်ရွက်လက်စဖြစ်သော စစ်အာဏာရှင်စနစ်အမြစ်ဖြတ်ချေမှုန်းရေးတာဝန်ကို ကျန်ရစ်သူရဲဘော်များက ဆက် လက်ထမ်းဆောင်တိုက်ပွဲဝင်သွားမည်ဖြစ်ကြောင်း CHU PDFက ကတိပြုသည်။
ချောင်းဦးမြို့နယ်တွင် နှစ်ဖက်ထိတွေ့မှုများမကြာခဏ ရှိနေပြီး ယခုလ ၅ ရက်က ချောင်းဦးမြို့နယ်တပါယ်အင်းရွာကို စစ်ကောင်စီနှင့် ပျူစောထီးများ မီးရှို့ပြီး နောက် ဒေသခံကာကွယ် ရေးတပ်ဖွဲ့ဝင် ရဲဘော်တစ်ဦးမီးရှို့အသတ်ခံခဲ့ရသည်။
အလားတူ ချောင်းဦးမြို့နယ်၊ကံဇီးရွာအနီး တော်လှန်ရေးအင်အားစုများ၏ မိုင်းဆွဲပစ်ခတ်မှုများ ကြောင့် စစ်ကောင်စီနှင့် ပျူစောထီးအဖွဲ့မှ ၂၀ခန့် သေဆုံးကြောင်း ဇွန်လ၅ ရက်တွင် Farmers Revolution Force FRF (CHU)ကထုတ် ပြန်ထားသည်။
