ကော်သူးလေအုပ်ချုပ်နယ်မြေအတွင်းမှာရှိတဲ့ စာသင်ကျောင်းတွေမှာ ကျောင်းသားဦးရေ ပိုတိုးများလာပြီး နေရာထိုင်ခင်းနဲ့ ဘော်ဒါဆောင်တွေ အခက်အခဲရှိနေတယ်လို့ ကေအဲန်-ကရင်အမျိုးသားအစည်းအရုံး ပြောရေးဆိုခွင့်ရှိသူ ပဒိုစောတောနီးက ပြောပါတယ်။
အခုပညာသင်နှစ်အတွင်း ကေအဲန်ယူထိန်းချုပ်နယ်မြေအတွင်းမှာရှိတဲ့ စာသင်ကျောင်းတွေမှာ ကျောင်းသားဦးရေတွေဟာ အရင်ပညာသင်နှစ်ထက် ပိုမိုတိုးများလာပြီး အထက်တန်းအဆင့် စာသင်ကျောင်းမှာတင် ကျောင်းသားဦးရေ ၁၀၀၀ ကျော်အထိရှိလာတယ်လို့ ပဒိုစောတောနီးက ဆိုပါတယ်။
“အထက်တန်းကျောင်းက ကျောင်းသားဦးရေ ၁၀၀၀ ကျော်အထိရှိလာတယ်။ ကျောင်းသားတိုးလာတဲ့အကြောင်းရင်းက အချက်နှစ်ချက်ပဲရှိတယ်။ စစ်အာဏာသိမ်းလိုက်တော့ ကျောင်းတွေက ကိုးရိုးကားယားဖြစ်ကုန်တယ်။ ပြည်တွင်းထဲမှာရှိတဲ့ ကျောင်းတွေကမတက်နိုင်။ ဒုတိယတချက်က ကိုဗစ်ဖြစ်လိုက်တော့ ပိုဆိုးသွားတယ်။ အဲ့ဒီမှာ နီးစပ်ရာတွေကျတော့ အစိုးရကျောင်းတွေကလည်း ဟုတ်တိပတ်တိမတက်နိုင်တော့ ကျနော်တို့ဆီကိုလာတာ ဟိုးမနှစ်ကတည်းက ဖြစ်နေတယ် အဲ့ဒီအခြေအနေက” လို့ ပဒိုစောတောနီးက ဆိုပါတယ်။
ကေအဲန်ယူလက်အောက်ခံ စာသင်ကျောင်းတွေမှာ ကျောင်းသားဦးရေများပြားလာလို့ ကျောင်းဆောင်တွေထပ်တိုးတည်ဆောက်ရပြီး ကျောင်းဆရာဆရာမတွေလည်းလိုအပ်ချက်ရှိတယ်လို့ ကရင်ကျောင်းသားများကွန်ယက်(KSNG)က သတင်းပြန်ကြားရေးတာဝန်ခံ စောအဲ့ကညောက အခုလိုပဲပြောပြပါတယ်။
Public Service Announcement
“ကျနော့်အထင်တော့ စစ်ကောင်စီကျောင်းက အခြေအနေမကောင်းဘူးလေ အဲ့လိုလည်းသိရတယ်။ နိုင်ငံရေးကလည်း မကောင်းဘူး။ နေရာမလောက်ဘူး အဲ့ဒါကြောင့် နေရာတွေဆောက်ရတယ်။ ကျောင်းသားများတော့ ဆရာဆရာမတွေလည်း လိုလာတယ်”လို့ စောအဲ့ကညောက ဆိုပါတယ်။
ကေအဲန်ယူ ကော်သူးလေအုပ်ချုပ်နယ်မြေအတွင်းမှာ ကရင်ပညာရေးနဲ့ယဉ်ကျေးမှုဌာန(KECD)လက်အောက်ခံ စာသင်ကျောင်းနဲ့ ကိုယ်ထူကိုယ်ထကျောင်းတွေမှာ ပညာသင်ကြားနေတဲ့ ကျောင်းသားဦးရေဟာ (၁၀၀၀၀၀) နီးပါးရှိနေတယ်လို့ ပဒိုစောတောနီးရဲ့ ပြောကြားချက်အရ သိရပါတယ်။
ကေအဲန်ယူထိန်းချုပ်နယ်မြေအတွင်းမှာ မူလတန်း အလယ်တန်း အထက်တန်းကျောင်းတွေအပြင် ဂျူနီယာကောလိပ်ကျောင်း(၁၀)ကျောင်းနဲ့ ဆရာအတတ်သင်ကျောင်းနှစ်ကျောင်းလည်းရှိပြီး ကေအဲန်ယူစာသင်ကျောင်းတွေမှာ ကရင်၊ အင်္ဂလိပ်၊ သင်္ချာ၊ လူမှုရေး၊ ပထဝီ စတဲ့ဘာသာရပ်တွေကို သင်ကြားပေးနေတယ်လို့ သိရပါတယ်။
