ကေအဲန်ယူ-တပ်မဟာ ၃ နယ်မြေ လယ်ဒို(ကျောက်ကြီး)မြို့နယ်နဲ့ မုန်းမြို့နယ်အတွင်းမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော်(KNLA)တို့အကြား နှစ်ရက်အတွင်း တိုက်ပွဲသုံးကြိမ်ဖြစ်ပွားခဲ့ပြီး စစ်ကောင်စီဘက်က ဗိုလ်ကြီးတစ်ဦး အပါအဝင် (၁၉)ဦး သေဆုံးသွားခဲ့တယ်လို့ ကေအဲန်ယူက သတင်းထုတ်ပြန်ပါတယ်။
ကေအဲန်ယူထိန်းချုပ်နယ်မြေ ခလယ်လွီထူ(ညောင်လေးပင်)ခရိုင် လယ်ဒိုမြို့နယ်ထဲက နရွဲပင်ကျေးရွာနဲ့ ညောင်ကုန်းကျေးရွာကြားမှာနယ်မြေကျူးကျော်လာတဲ့ မနေ့ ဇွန်(၂၆)ရက် မနက် ၇ နာရီအချိန်ခန့်ကစပြီး KNLA တပ်မဟာ ၃ နဲ့ စစ်ကောင်စီတပ်တို့အကြား ထိပ်တိုက်တိုက်ပွဲဖြစ်ပွားခဲ့တာပါ။
အဲ့ဒီတိုက်ပွဲမှာ စစ်ကောင်စီဘက်က သုံးဦးသေဆုံးသွားခဲ့ပြီး တိုက်ပွဲဖြစ်ပွားပြီးတဲ့နောက် စစ်ကောင်စီတပ်က အင်းနက်ကျေးရွာအုပ်စုရှိ ကျေးရွာတွေထဲကို လက်နက်ကြီးတွေနဲ့ ပစ်ခတ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဇွန် ၂၆ ရက်နေ့ ညနေ ၆ နာရီအချိန်မှာတော့ စစ်ကောင်စီတပ်က လူအင်အားအပြည့်ပါတဲ့ စစ်ကားငါးစီးနဲ့ ညောင်ဝိုင်းကျေးရွာမှာ တပ်လာရောက်ချထားခဲ့ပြီး မုန်းဒေသဘက်မှာလည်း လက်နက်အပြည့်အစုံ၊ လူအင်အားအပြည့်ပါတဲ့ စစ်ကားခြောက်စီးနဲ့ ငဗြက်အင်းကျေးရွာထဲကို ဝင်ရောက်လာကြတယ်လို့ ကေအဲန်ယူထံကနေ သိရပါတယ်။
Public Service Announcement
ဒါ့အပြင် ပြီးခဲ့တဲ့ ဇွန်(၂၅)ရက်နေ့ မနက် ၇ နာရီအချိန်ကလည်း ငဗြက်အင်းနဲ့ အင်းနက်ကျေးရွာကြားမှာ စစ်ကောင်စီတပ်နဲ့ KNLA တပ်မဟာ ၃ တို့အကြား ထိပ်တိုက်ပွဲဖြစ်ပွားခဲ့ပြီး အဆိုပါတိုက်ပွဲမှာ စစ်ကောင်စီဘက်က ဗိုလ်ကြီးတစ်ဦး၊ တပ်ကြပ်ကြီးတစ်ဦးနဲ့ စစ်ကောင်စီခန့် နတ်သံကွင်းမြို့ အုပ်ချုပ်ရေးမှူးအပါအဝင် (၁၄)ဦး သေဆုံးခဲ့တယ်လို့ ထုတ်ပြန်ချက်မှာပါရှိပါတယ်။
တိုက်ပွဲဖြစ်ပွားပြီးတဲ့နောက် စစ်ကောင်စီတပ်ဟာ အင်းနက်ကျေးရွာအုပ်စုထဲကို ရည်ရွယ်ချက်ရှိရှိ လက်နက်ကြီးတွေနဲ့ ပစ်ခတ်ခဲ့သေးတာပါ။
ဇွန်(၂၅) နေ့ ညနေ ၅ နာရီအချိန်ကလည်း ကေအဲန်ယူ-ညောင်လေးပင်ခရိုင် မုန်းမြို့နယ်ထဲက နောင်ကုန်းကျေးရွာအရှေ့ဘက်မှာ စစ်ကောင်စီတပ်နဲ့ KNLA တပ်မဟာ ၃ တို့အကြား ထိပ်တိုက်တိုက်ပွဲဖြစ်ပွားခဲ့ပြီး စစ်ကောင်စီဘက်က နှစ်ဦးသေဆုံးခဲ့ကာ တိုက်ပွဲဖြစ်ပြီးတဲ့နောက် စစ်ကောင်စီတပ်က ရန်မျိုးအောင်ကျေးရွာထဲကို လက်နက်ကြီးပစ်ခတ်ခဲ့တာဖြစ်ပါတယ်။
အခုလို တိုက်ပွဲတွေဖြစ်ရတာဟာ ကေအဲန်ယူအုပ်ချုပ်နယ်မြေထဲကို စစ်ကောင်စီတပ်က နယ်မြေကျူးကျော် စစ်ရေးလှုပ်ရှားလာတာဖြစ်တယ်လို့ ကေအဲန်ယူက ဆိုထားပါတယ်။
စစ်ကောင်စီတပ်ဟာ ရည်ရွယ်ချက်ရှိရှိ ကျေးရွာတွေထဲကို လက်နက်ကြီးနဲ့ပစ်ခတ်ခဲ့တာကြောင့် ဒေသခံပြည်သူ ၅ ဦး ထိခိုက်ဒဏ်ရာရရှိခဲ့ပြီး နေအိမ်အဆောက်အဦးတွေ ဘာသာရေးအဆောက်အဦးတွေ ထိခိုက်ပျက်စီးခဲ့ရကာ ကျေးရွာ(၁၄)ရွာက ဒေသခံပြည်သူ (၁၀၅၂၆)ဦး ဘေးလွတ်ရာကို ထွက်ပြေးတိမ်းရှောင်နေခဲ့ရတယ်လို့ ထုတ်ပြန်ချက်ကနေ သိရပါတယ်။
ထွက်ပြေးတိမ်းရှောင်ရတဲ့ ကျေးရွာနေပြည်သူလူထုတွေကို ကေအဲန်ယူနဲ့ ဒေသခံကရင်လူမှုရေးရာအဖွဲ့တို့ ပူးပေါင်းပြီး ကယ်ဆယ်နေရာချထားတာ၊ ကျန်းမာရေးနဲ့ စားဝတ်နေရေးအတွက် ကူညီစောင့်ရှောက်ပေးတာတွေ လုပ်ဆောင်ပေးချက်ရှိနေတယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
