▪️အာဆီယံအထူးကိုယ်စားလှယ်၏ တောင်းဆိုချက်မှာ လုံလောက်မှုမရှိဟု လေ့လာသူအချို့သုံးသပ်
နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို နေပြည်တော်အကျဉ်းထောင်အတွင်းမှ ယခင်ထိန်းသိမ်းထားရာနေအိမ်သို့ ပြန်ပို့ရန် အာဆီယံအထူးကိုယ်စားလှယ် Prak Sokhonn က တောင်းဆိုလိုက်သည်။
မြန်မာ့အကျပ်အတည်းငြိမ်းချမ်းစွာအဖြေရှာရေးအတွက် အားလုံးပါဝင်သော အမျိုးသားပြန်လည် သင့်မြတ်ရေးလုပ်ငန်းစဉ်ကို ထပ်မံအချိန်မဆိုင်းဘဲ စတင်ဆောင်ရွက်သင့်ကြောင်း အာဆီယံ နိုင်ငံများက ခိုင်မာစွာတိုက်တွန်းထားကြောင်း အာဆီယံအထူးကိုယ်စားလှယ်၊ ကမ္ဘောဒီးယားနိုင်ငံခြားရေးဝန်ကြီးက ထုတ်ပြန်သည်။
“ငြိမ်းချမ်းတဲ့နိုင်ငံရေးအဖြေရှာမှုကနေ မြန်မာနိုင်ငံပုံမှန်ပြန်ဖြစ်ရေးနဲ့ အမျိုးသားပြန်လည်သင့် မြတ်ရေးအတွက် ဒေါ်အောင်ဆန်းစုကြည်ဟာ အရေးပါတဲ့အခန်းကဏ္ဍမှာ ရှိနေတယ်ဆိုတာကို နိုင်ငံတကာကရော၊ ပြည်တွင်းက ပြည်သူအများအပြားကပါ မှတ်ယူထားဆိုတာသေချာပါတယ်” ဟု Prak Sokhonn က ဆိုသည်။
သို့သော် အာဆီယံအထူးကိုယ်စားလှယ်၏ တောင်းဆို ချက်သည် မြန်မာ့အကျပ်အတည်းကို ဖြေရှင်းရန် အထောက်အကူပြုမည်မဟုတ်သကဲ့သို့ လုံလောက်မှုမရှိကြောင်း နိုင်ငံရေးလေ့လာသူ အချို့က သုံးသပ်သည်။
ပြည်တွင်းနှင့် ကုလသမဂ္ဂအပါအဝင် နိုင်ငံတကာက တောင်းဆိုနေသည်မှာ ဒေါ်အောင်ဆန်းစုကြည်နှင့် မတရား သဖြင့်ဖမ်းဆီးထိန်းသိမ်းခံ နိုင်ငံရေးအကျဉ်းသားအားလုံးလွတ်မြောက်ရေး၊ ဒီမိုကရေစီလမ်းကြောင်းပေါ် ပြန်သွားရေး၊ အကြမ်းဖက်စစ်တပ်၏ ပြည်သူလူထုအပေါ် ကျူးလွန်မှုမှန်သမျှကို အရေးယူအပြစ်ပေးရေး စသည့်အချက်များဖြစ်ကြောင်း လေ့လာသူအချို့က ပြောသည်။