တနင်္သာရီကမ်းရိုးတန်းနဲ့ ရခိုင်၊ မွန်နဲ့ ကရင်ပြည်နယ်တွေကို မိုးသတိပေး

လာမယ့် ဇူလိုင် ၆ ရက်ကနေ ၁၀ ရက်အတွင်းကစပြီး မုတ်သုံလေတဖြည်းဖြည်းအားကောင်းလာနိုင်ကာ တနင်္သာရီကမ်းရိုးတန်းနဲ့ ရခိုင်၊ မွန်နဲ့ ကရင်ပြည်နယ်တွေမှာ မိုးကြီးနိုင်ပြီး ရေတိုက်စားမှု၊ မြေပြိုမှုဘေးကိုပါကြုံတွေ့ရနိုင်တယ်လို့ NUG ရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာနက သတင်းထုတ်ပြန်ထားပါတယ်။

အခုတပါတ်အတွင်းမှာ မိုးလယ်ကာလကိုရောက်ရှိပြီး မြန်မာကမ်းရိုးတန်းဒေသတွေမှာ လေပြင်းထန်တာနဲ့ မိုးသည်းထန်လာမှာဖြစ်ကာ ရခိုင်ကမ်းရိုးတန်း၊ မြစ်ဝကျွန်ပေါ်၊ မွန်-တနင်္သာရီကမ်းရိုးတန်းတွေမှာ မိုးပိုရွာသွန်းလာနိုင်တယ်လို့ ထုတ်ပြန်ချက်မှာဖော်ပြထားပါတယ်။

ဒါ့အပြင် ဧရာ၀တီ၊ ချင်းတွင်း၊ သံလွင်မြစ်တွေမှာ မြစ်ရေတွေမြင့်တက်လာနိုင်ပြီး ရေကြီးမှုဘေးအန္တရာယ်ကိုလည်း သတိပြုရမှာဖြစ်တယ်လို့ ထုတ်ပြန်ချက်မှာ အသိပေးထားပါတယ်။

စစ်ကောင်စီလက်အောက်ခံ မိုးဇလဌာနရဲ့ ထုတ်ပြန်ချက်ထဲမှာလည်း ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းတွေမှာ မုတ်သုံလေ အားကောင်းရာကနေ အားအလွန်ကောင်းနေပြီး၊ ကျန်ဘင်္ဂလားပင်လယ်အော်မှာတော့ မုတ်သုံလေအားအသင့်အတင့်ကနေ အားကောင်းနေကာ နောက်(၂) ရက်အတွင်း ကရင်ပြည်နယ် မွန်ပြည်နယ်အပါအဝင် တိုင်းနဲ့ပြည်နယ် (၈)ခုမှာ မိုးဆက်လက်ပိုနေမယ်လို့ သိရပါတယ်။

Public Service Announcement