မကွေးတိုင်း ပခုက္ကူမြို့တွင် ရွှေဆိုင်တစ်ဆိုင် ဓားပြတိုက်ခံရမှုနှင့်ပတ်သက်ပြီး ဓားပြတိုက်သည့် အဖွဲ့မှာ Young Force (UG)ဟု အဖွဲ့အမည်ခေါင်းစဉ်တပ်နေမှုရှိ၍ ယင်းဖြစ်စဥ်နှင့် သက်ဆိုင်မှုမရှိကြောင်း Young Force (UG)က ထုတ်ပြန်ရှင်းလင်းလိုက်သည်။
ဇူလိုင် ၄ရက်က ပခုက္ကူမြို့ရှိ ရှမ်းဧကရီရွှေဆိုင် ဓားပြတိုက်ခံရမှုအပေါ် ထိုသို့ ရှင်းလင်းခြင်းဖြစ်သည်။ ထိုသို့ ဓားပြတိုက်ခံရ၍ ငွေကြေးနှင့်ရွှေထည်ပစ္စည်းများ ကျပ်သိန်း ၁၀၀ကျော် ဓားပြတိုက်သွားသည်ဟု ဆိုသည်။
ယင်းနှင့်ပတ်သက်၍ Young Force (UG)က “လတ်တလော ပခုက္ကူမြို့တွင် ဖြစ်ပွားခဲ့သော (ရွှေဆိုင်)နှင့် ပက်သက်ပြီး မိမိတို့ အဖွဲ့အစည်းနာမည်အား ခေါင်းစဥ်တပ်လျှက်ရှိကြောင်း ကြားသိရပါသည်။ ကျွန်တော်တို့ အဖွဲ့အစည်းသည်ယခုအချိန်ထိဆောင်ရွက်ခဲ့သော ကိစ္စအဝဝကို page မှ ထုတ်ပြန်လျှက်ရှိပါသည်။ပြည်သူများအပေါ်မှလည်း ငွေကြေးကောက်ခံခြင်း၊ခြိမ်းခြောက်ခြင်း အလျဥ်းမရှိခဲ့ပါ”ဟု ဖော်ပြထားသည်။
ထို့အပြင် ဆောင်ရွက်ခဲ့သောလုပ်ငန်းကိစ္စများအတွက်လည်းအချိန်မရွေးရှင်းလင်းရန်နှင့် တာဝန်ယူရန်အသင့်ရှိကြောင်း ထုတ်ပြန်သည်။
Public Service Announcement
အဖွဲ့မှ မထုတ်ပြန်သည့် ကိစ္စများနှင့် သက်ဆိုင်ခြင်းမရှိကြောင်း ပြည်သူများအားအသိ ပေးတင်ပြလိုက်သည်ဟုဆိုသည်။
Young Force (UG) အနေဖြင့် အမျိုးသားညီညွတ်ရေးအစိုးရ(NUG) ၏စည်းမျည်းစည်းကမ်းများကျင့်ဝတ်များနှင့်အညီ၊တော်လှန်ရေး အောင်မြင်သည်အထိဆက်လက် တိုက်ပွဲဝင်သွားမည်ဖြစ်ကြောင်း ထုတ်ပြန်ခဲ့ပြီး တော်လှန်ရေးတပ်ဖွဲ့များ၏ ဂုဏ်သိက္ခာကျဆင်းစေမည့် ကိစ္စရပ်များအား လုံး၀လုပ်မည်မဟုတ်ကြောင်း ဖော်ပြထားသည်။
