စစ်ရေးတင်းမာနေ၍ မန္တလေး – မိုးမိတ်လမ်းပိုင်းအား ခရီးသွားလာခြင်းမပြုရန် မိုးမိတ်မြို့ ပြည်သူ့ကာကွယ်ရေးတပ်မတော် သတိပေး

စစ်ကောင်စီက အင်အားတိုးမြှင့်လာပြီးနောက် စစ်ရေးတင်းမာနေ၍ မန္တလေး – မိုးမိတ် လမ်းပိုင်း အား မည်သည့်နည်းလမ်း နှင့်မျှခရီးသွားလာခြင်း မပြုကြရန် မိုးမိတ်မြို့ပြည်သူ့ကာကွယ်ရေး တပ်မတော်က သတိပေးထုတ်ပြန်ထားသည်။

စစ်ကောင်စီတပ်သည် မန္တလေး- မိုးမိတ်လမ်းပိုင်း အသုံးပြုကာ စစ်လက်နက် ပစ္စည်း၊ ရိက္ခာများ နှင့် စစ်အင်အားများ သယ်ယူပို့ဆောင် နေသည်ဟု လတ်တလောရရှိထားသည့် မြေပြင်သတင်းကို မိုးမိတ်မြို့ပြည်သူ့ကာကွယ်ရေး တပ်မတော်က ဇူလိုင် ၁၇ရက်တွင် ထုတ်ပြန်ထားသည်။

ထို့အ​ပြင် ပြည်သူ့ကာကွယ်ရေး တပ်မတော်နှင့် စစ်ကောင်စီတပ်တို့ စစ်ရေးအခြေအနေ တင်းမာနေ၍ မန္တလေး- မိုးမိတ်လမ်းပိုင်းကို ဇူလိုင် ၁၇ရက်ကစ၍ ဖြတ်သန်းသွားလာခြင်းမပြုရန် မေတ္တာရပ်ခံထားသည်။

“သတိပေးတားမြစ်ချက်အား မလိုက်နာဘဲ တစ်စုံတရာ ဖြစ်ပွားခဲ့ပါက မိမိတို့ ပြည်သူ့ကာကွယ်ရေး တပ်မတော်ဘက် မှ တာဝန်ယူမည် မဟုတ်ကြောင်း ကြိုတင်အသိပေးအပ်ပါသည်။ ကျေးဇူးပြု၍ မိဘပြည်သူများအနေဖြင့် ပူးပေါင်းပါဝင်ပေးကြပါရန် မေတ္တာရပ်ခံအပ်ပါသည်”ဟု မိုးမိတ်မြို့ ပြည်သူ့ကာကွယ်ရေး တပ်မတော်က ထုတ်ပြန်ထားသည်။

Public Service Announcement

မိုးမိတ်မြို့ပြည်သူ့ကာကွယ်ရေး တပ်မတော်သည် ကချင်လွတ်မြောက်ရေး တပ်မတော် (KIA) အကူအညီဖြင့် ဖွဲ့စည်းထားခြင်းဖြစ်သည်။ပြည်သူ့ကာကွယ်ရေးတပ်မတော် ဖွဲ့စည်းပြီးကြောင်းကို ဇူလိုင် ၁၁ရက်က တရားဝင်ကြေငြာခဲ့သည်။ ယင်းနေ့တွင် မိုးမိတ်ခရိုင်ထွေအုပ်ရုံးကို မိုင်းခွဲ တိုက်ခိုက်ခဲ့ပြီး ဇူလိုင် ၁၃ရက်တွင် စစ်ကောင်စီတပ်၏ ခြေလျင်တပ်ရင်း (၂၂၃)ဂိတ်စခန်းနှင့် မိုးမိတ်မြို့မရဲစခန်းကို ထပ်မံ မိုင်းဆွဲတိုက်ခိုက်ခဲ့သည်။