စစ်ကိုင်းတိုင်း၊ ဝက်လက်မြို့နယ်အတွင်းရှိ ဧရာဝတီမြစ်ကြောင်းနှင့် ခရိုင်ချင်းဆက်လမ်းကို ညပိုင်းအချိန်တွင် အသွားအလာ ခေတ္တရပ်ဆိုင်းထားရန် GZ Special Task Force – Wetlet အဖွဲ့က သြဂုတ် ၅ရက် ညတွင် သတိပေးကြေညာသည်။
ဧရာဝတီမြစ်ရိုးတစ်လျှောက်တွင် အကြမ်းဖက်စစ်ကောင်စီတပ်၊ ပျူနှင့် စစ်ကောင်စီသတင်းပေးများ သွားလာနေသောကြောင့် မြစ်ဘေးရှိ ဒေသခံပြည်သူများအနေဖြင့် စစ်ရေးနားစွင့်ကာ သတိဝိရိယရှိရန်နှင့် ရေကြောင်းအသုံးပြုမှုကို ည၈နာရီမှ နောက်တစ်နေ့နံနက် ၅ နာရီအတွင်း အရေးပေါ်ကိစ္စမှလွဲ၍ ဖြတ်သန်းသွားလာခြင်း လုံးဝမပြုဘဲ ရပ်ဆိုင်းထားရန် GZ Special Task Force – Wetlet အဖွဲ့က မေတ္တာရပ်ခံသည်။
ယခုကြေညာချက်သည် ထုံးဘို၊ ရှားကွဲ၊ ရေဂမိုး၊ ရွာသစ်၊ လှေပို့ဆိပ်၊ သစ်ဆိမ့်၊ ကူကြီး၊ ရေလမော်၊ ငါးပတ်ချောင်း၊ သရက်ပင်ဆိပ်၊ မှော်ဦး၊ အင်ဒေါင်း၊ ရွာသာ၊ ကမ်းဖြူ၊ ရွာသစ်အထိ အကျုံးဝင်ကြောင်း GZ Special Task Force – Wetlet အဖွဲ့က အသိပေးသည်။
အလားတူ ဝက်လက်မြို့နယ်ရှိ အမှတ် (၃)ခရိုင်ချင်းဆက်လမ်းအား ည၈နာရီမှ နံနက် ၅ နာရီအတွင်း ဖြတ်သန်းသွားလာခြင်း လုံးဝမပြုလုပ်ရန်၊ အရေးပေါ်ကိစ္စမှလွဲ၍ လမ်းအသုံးပြုမှုရပ်ဆိုင်းထားရန် GZ Special Task Force – Wetlet အဖွဲ့က ထပ်မံသတိပေးသည်။
ယမန်နေ့(သြဂုတ်လ၅ရက်) နံနက်ပိုင်းက အင်အား ၁၀၀ခန့်ပါသော အကြမ်းဖက်စစ်ကောင်စီတပ်များသည် မန္တလေးတိုင်း၊ စဥ်ကူးမြို့နယ်၊ ထုံးကြီးကျေးရွာဘက်မှ မြစ်အနောက်ဘက်ကမ်းသို့ ကူးလာခဲ့သည်။
ထို့နောက် စစ်ကိုင်းတိုင်း၊ ဝက်လက်မြို့နယ်ရှိငါးပါတ်ချောင်း၊ကမ်းဖြူ၊အင်ဒေါင်း စသည့်ကျေးရွာများကို လှည့်ပတ်မွှေနှောက်ကာလက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခဲ့သည်။
ထိုသို့ပစ်ခတ်မှုကြောင့် အင်ဒေါင်းကျေးရွာက ပြည်သူ(၃)ဦး လက်နက်ကြီးထိမှန်ခဲ့ကာ မစိုးရိမ်ရကြောင်း ဝက်လက်မြို့နယ်ရှိ ပြည်သူ့ကာကွယ်ရေးတပ်ဖွဲ့ဝင် ဗိုလ်ကျားကြီးက ပြောသည်။