ဝက်လက်မြို့နယ်မှာ စစ်ရှောင်ပြည်သူ ရှစ်ထောင်ကျော် အကူအညီလိုအပ်နေ

ဇန်နဝါရီ-၃၁၊ ၂၀၂၆။ ဇေအောင်/People’s Spring

စစ်ကိုင်းတိုင်း၊ ဝက်လက်မြို့နယ်မှာ စစ်ကောင်စီတပ်စစ်ကြောင်းကြောင့် ကျေးရွာ ၁၄ ရွာက ပြည်သူ ၈၅၀၀ ကျော် ဘေးလွတ်ရာတိမ်းရှောင်နေရပြီး အကူအညီတွေလိုအပ်နေကြောင်း ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက ပြောပါတယ်။

ဇန်နဝါရီ နောက်ဆုံးပတ်အတွင်း ဝက်လက်မြို့နယ်အရှေ့ခြမ်းမှာ ထိုးနေတဲ့ စစ်တပ်စစ်ကြောင်းကြောင့် သစ်ဆိမ့်၊ ငါးပတ်ချောင်း၊ ရှားကွဲ၊ ထုံးဘို၊ ကူကြီး၊ ရေဂမိုး၊ မင်းရွာတောင်၊ ရေလည်မှော်၊ ရွာသာ၊ နတ်မှော်ဦး၊ အင်ဒေါင်း၊ လှေပို့ဆိပ်၊ ရွာသစ်နဲ့ ကမ်းဖြူစတဲ့ကျေးရွာ ၁၄ ရွာက အိမ်ထောင်စု ၁၇၇၇ စု၊ လူဦး​ရေ ၈၅၆၆ ဦးဟာ ထွက်ပြေးတိမ်းရှောင်နေရကြောင်း ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက ပြောပါတယ်။

စစ်ရှောင်ပြည်သူတွေဟာ အလုပ်အကိုင်ကြပ်တည်းမှုတွေကြောင့် စားဝတ်နေရေးမပြေလည်မှုတွေအပြင် နေထိုင်စရာ အခက်အခဲများစွာရှိနေတယ်လို့ အထက်ပါကော်မတီက ပြောပါတယ်။

Public Service Announcement

“အဓိကကတော့ တဲဆောက်ဖို့ မိုးကာတွေလိုအပ်ပြီး စားဝတ်နေရေးအတွက်တော့ ဆန်၊ဆီပေါ့”လို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီရဲ့တာဝန်ရှိသူက ပြောပါတယ်။

စစ်ဘေးရှောင်ပြည်သူတွေကို စားနပ်ရိက္ခာ၊အမိုးအကာတွေ သွားရောက်လှူဒါန်းနိုင်ဖို့ ပြည်သူတွေအနေနဲ့ တက်နိုင်တဲ့ဘက်က ပါဝင်ကူညီပေးဖို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက မေတ္တာရပ်ခံထားပါတယ်။

ပြီးခဲ့တဲ့ ဇန်နဝါရီ ၂၆ ရက်ကလည်း ဝက်လက်မြို့နယ်အရှေ့ခြမ်းနဲ့ နယ်မြေချင်းကပ်နေတဲ့ ရွှေဘိုမြို့နယ်၊ ငါးပိအိုးရွာကို စစ်တပ်က တစ်ရက်တည်း လေကြောင်းကနေ နှစ်ကြိမ် ဗုံးကြဲလို့ ပြည်သူ ၃ ဦး သေဆုံးပြီး ၁၀ ဦးကျော် ဒဏ်ရာရခဲ့ပါသေးတယ်။