လက်နက်ခဲယမ်းနှင့် ရိက္ခာများတင်ဆောင်ထားပြီး လက်နက်များ အသင့်ပြင် ထားသည့် စစ်ကောင်စီသင်္ဘော(၆)စီး ဂေါဝိန်ဆိပ်ကမ်းမှ စတင်ထွက်ခွာ

လက်နက်ခဲယမ်းနှင့် ရိက္ခာများတင်ဆောင်ထားပြီး လက်နက်များအသင့်ပြင် ထားသည့် စစ်ကောင်စီ သင်္ဘော (၆)စီးသည် မန္တလေးမြို့ ဂေါဝိန်ဆိပ်ကမ်းမှ စတင်ထွက်ခွာလာပြီဖြစ်ကြောင်း ပြည်သူ့ကာကွယ်ရေးရဲဘော်များက ထုတ်ပြန်သည်။

မန္တလေးမြို့ ဂေါဝိန်ဆိပ်ကမ်းတွင် သြဂုတ်လဆန်းကတည်းက ဆိပ်ကမ်းကပ် ထားသည့် စစ်ကောင်စီသင်္ဘောများသည် ယနေ့(သြဂုတ် ၈ရက်) စတင်ထွက်ခွာ လာ​ခြင်းဖြစ်သည်။

သံခွန်သင်္ဘောအသေးတစ်စီးနှင့်အတူ ပင်လုံ၊ပြည်သူ၊ပြဒါးရှင်၊ပတိုင်း၊ပုံညာဟု အမည်ပေး ထားသည့် သင်္ဘော ၆စီးသည် ဗန်းမော်မြို့ဘက်သို့ ဧရာဝတီမြစ် ကြောင်းအတိုင်း ဆန်တက် လာသည်ဟု Tigyaing Revolution -TRက အသိပေးထားသည်။

သင်္ဘောများ၏ အမိုးပေါ်တွင် စက်လက်များ၊အမြောက်များ ၊စနိုက်ပါများ တပ်ဆင်ထားကြောင်းနှင့် မြစ်ကမ်းဘေးပြည်သူများ ဂရုပြုနေထိုင်ကြရန် Tigyaing Revolution -TRက သတိပေးသည်။

Public Service Announcement

အထက်ပါ စစ်ကောင်စီသင်္ဘောများတွင် စစ်ကိုင်းတိုင်းနှင့် ကချင်ပြည်နယ်သို့ ပို့မည့်လက်နက်ခဲယမ်းနှင့် ရိက္ခာများတင်ဆောင်ထားသောကြောင့် မြစ်ကြောင်းတလျှောက် ပြည်သူများက သတင်းပေးပို့ရန် ပြည်သူ့ကာကွယ်ရေး ရဲဘော်များက တောင်းဆိုထားသည်။

စစ်ကောင်စီသည် ချင်းတွင်းနှင့်ဧရာဝတီမြစ်ကြောင်းကို အသုံးပြုကာ စစ်ကိုင်းတိုင်း နှင့်ကချင်ပြည်နယ်သို့ လက်နက်ခဲယမ်းနှင့် ရိက္ခာများ ပို့ဆောင်နေသည်။ မြစ်ကြောင်းတလျှောက် ပြည်သူ့ကာကွယ်ရေးရဲဘော်များက စစ်ကောင်စီရေကြောင်းကို ကြားဖြတ်တိုက်ခိုက်ကြသည်။