အာဏာသိမ်းပြီး ပထမဆုံးအကြိမ် ဂျပန်အမတ် နေပြည်တော်ရောက်

ဂျပန်အောက်လွှတ်တော်အမတ်သည် စစ်တပ်၏တရားမဝင် အာဏာသိမ်းမှု အပြီး ပထမဆုံး အကြိမ်အဖြစ် နေပြည်တော်သို့လာရောက်ကာ အကြမ်းဖက်စစ်ခေါင်းဆောင်မင်းအောင်လှိုင်နှင့် ယမန်နေ့(ဩဂုတ် ၁၁ ရက်)တွင် တွေ့ဆုံခဲ့သည်။

လက်ရှိအာဏာရပါတီ လစ်ဘရယ်ဒီမိုကရက်တစ်ပါတီမှ လွှတ်တော်အမတ် ဟီရိုမီချိဝါတနာဘီ နှင့် မင်းအောင်လှိုင်တို့တွေ့ဆုံစဉ် နှစ်နိုင်ငံဆက်ဆံရေး မြှင့်တင်ရေးနှင့် ရင်းနှီးမြှုပ်နှံမှုကို တွန်းအားပေးရေးတို့ကိုဆွေးနွေးခဲ့ကြောင်း စစ်ကောင်စီဝါဒဖြန့်ရုပ်သံက ထုတ်လွှင့်သည်။

ရန်ကုန်ရှိ ဂျပန်သံရုံးကမူ ဝါတနာဘီ၏ ခရီးစဉ်ကို သိရှိသော်လည်း လွှတ်တော်အမတ်ကိုယ် တိုင်ခရီးစဉ်စီစဉ်ခြင်းဖြစ်ပြီး ခရီးစဉ်အစီအစဉ် သို့မဟုတ် အခြားသော အသေးစိတ်ကို ၎င်းတို့ မသိရှိ ကြောင်း ပြောသည်။

အကြမ်းဖက်စစ်ကောင်စီသည် ဇူလိုင် ၃၀ ရက်တွင် ရန်ကုန်မြို့ ပြောက်ကျား သပိတ် သတင်းယူနေသည့် အသက် ၂၀ အရွယ် ဂျပန်နိုင်ငံသားကိုဖမ်းဆီးခဲ့ပြီး ပုဒ်မ သုံးခုဖြင့် အမှုဖွင့်ထားသည်။ အထက်ပါလွှတ်တော်အမတ်၏ ခရီးစဉ်သည် အဆိုပါဂျပန်လူငယ်ဖမ်းဆီးခံထားရမှုနှင့် သက် ဆိုင်ခြင်းရှိ၊ မရှိ မသိရပေ။

Public Service Announcement

ထို့အပြင် စာတိုက်နှင့်ဆက်သွယ်ရေးဝန်ကြီးဟောင်း ဟီဒိုဝါတနာဘီသည် အာဏာသိမ်းမှုအပြီး မြန်မာသို့ ကြိမ်ဖန်များစွာ လာရောက်ပြီး မင်းအောင်လှိုင်နှင့်လည်း တွေ့ဆုံခဲ့သည်။ ဟီဒိုဝါတနာဘီသည် ဂျပန်-မြန်မာအသင်း၏ လက်ရှိ ဥက္ကဌဖြစ်သည်။ ဂျပန်-မြန်မာအသင်းသည် အစိုးရနှင့် သက်ဆိုင်ခြင်းမရှိဘဲ တိုကျိုနှင့် ရန်ကုန်၌ ရုံးများဖွင့်လှစ်ထားသည်။

ဂျပန်ရောက်မြန်မာများက ဂျပန်အစိုးရကို အကြမ်းဖက်စစ်ကောင်စီနှင့် ပတ်သက်ခြင်းမပြုရန်၊ လက်ရှိဆက်ဆံမှုများကို ဖြတ်တောက်ရန်၊ ပိတ်ဆို့အရေးယူမှုပြုလုပ်ရန် တောင်းဆိုထားသည်။

ကိုးကား – Nikkei Asia