စစ်ကောင်စီက ရဟတ်ယာဉ်ဖြင့် ခဲယမ်းများ ဖြည့်တင်းနေ
ချင်းပြည်နယ် ဟားခါးမြို့နှင့် ထန်တလန်မြို့အကြားတွင် ချင်းလက်နက်ကိုင် ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲများဆက်တိုက်ဖြစ်ပွားလျက်ရှိရာ ၁၈ရက်ကြာ တိုက်ပွဲအတွင်း စစ်ကောင်စီတပ်က ၅၀ ကျော်သေဆုံးနိုင်ကြောင်း ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောကြားသည်။
စစ်ကောင်စီတပ်သည် ဇူလိုင်လကုန်ပိုင်းတွင် ဟားခါး – ထန်တလန်ကြား သီမစ်ချောင်း ဒေသသို့ ထိုးစစ်ဆင်ဝင်ရောက်လာရာ CNA နှင့် CDF တပ်ဖွဲ့များပါဝင်သည့် ပူးပေါင်းအဖွဲ့က တိုက်ခိုက်ခဲ့ခြင်းဖြစ်သည်။
“ဇူလိုင် ၃၀ရက်ကနေ ယနေ့အထိ ဟားခါး – ထန်တလန်ကြား ၁၈ရက်ကြာ တိုက်ပွဲဟာ စကစ အနေနဲ့ သူတို့ မီးရှို့ဖျက်ဆီးလိုက်တဲ့ ထန်တလန်မြို့ ပြန်လည်တည်ဆောက်ရေးဆိုတဲ့ ခေါင်းစဉ် အောက်ကနေ နယ်မြေစိုးမိုးရေးကို ဦးတည်တဲ့ တိုက်ပွဲပါပဲ”ဟု ဆလိုင်းထက်နီက ပြောပြသည်။
တိုက်ပွဲများအတွင်း ဟားခါးအခြေစိုက် စစ်ကောင်စီတပ်က လက်နက်ကြီးများဖြင့် နေ့စဉ် ပစ်ခတ် နေပြီး ရဟတ်ယာဉ်ဖြင့် သုံးကြိမ်လာရောက်၍ ကျည်ဆံ၊ခဲယမ်းများ ဖြည့်တင်းခဲ့ကြောင်း၊ တိုက်လေယာဉ် လာရောက်မှုရှိခဲ့သော်လည်း ရာသီဥတု အခြေအနေကြောင့် လှည့်ပြန်သွားသည်ဟု ယူဆရကြောင်း ၎င်းက ဆိုသည်။
Public Service Announcement
“သူတို့ အကျအဆုံးများတယ် ခန့်မှန်းက ၅၀ ကျော်ပေါ့။ လက်နက်နဲ့ ကျည်တချို့ရရှိတယ်။ မိမိဘက်က ၅ဦး မပြောပလောက်တဲ့ ဒဏ်ရာရတယ်” ဟု ဆလိုင်းထက်နီက ပြောကြားသည်။
ချင်းလက်နက်ကိုင်ပူးပေါင်းတပ်နှင့် စစ်ကောင်စီတပ်တို့သည် ပြီးခဲ့သည့် လအတွင်းက ဟားခါး – ဖလမ်းအကြား တိုက်ပွဲများ ဖြစ်ခဲ့ပြီး ယခုလတွင် ဟားခါးထန်တလန်ကြား၌ တိုက်ပွဲများ ပြင်းထန်လျက်ရှိသည်။
“ရှေ့ဆက်တိုက်ပွဲက ကျယ်လာဖွယ်ရှိပါတယ်” ဟု ဆလိုင်းထက်နီက ပြောကြားသည်။
