မုံရွာ – မန္တလေးလမ်းပေါ် ခြိမ်းခြောက်ငွေတောင်းနေသည့် ပျူစောထီးအဖွဲ့ကို မိုင်းဆွဲတိုက်ခိုက်

စစ်ကိုင်းတိုင်း၊ မုံရွာ – မန္တလေးလမ်းမကြီးပေါ်တွင် ခရီးသွားပြည်သူများအား စစ်ဆေးငွေတောင်းခံနေသည့် စစ်ကောင်စီလက်အောက်ခံ ပျူစောထီးအဖွဲ့များအား ယမန်နေ့က မိုင်းဆွဲတိုက်ခိုက်ခဲ့ကြောင်း PDF South Monywaက ထုတ်ပြန် သည်။

ယမန်နေ့ (သြဂုတ် ၁၇ရက်) နံနက်၆နာရီခန့်က မုံရွာ-မန္တလေးလမ်းမကြီးပေါ် မုံရွာ-ချောင်းဦးလမ်းပိုင်းတစ်နေရာတွင် တောပုကျေးရွာမှ စစ်ကောင်စီတပ်လက်အောက်ခံ ပျူများသည် ခရီးသွားပြည် သူများအား လှည့်လည်စစ်ဆေးကာ ငွေတောင်းခံမှုများ ပြုလုပ်နေ၍ မိုင်းဆင်ထားသည့်နေရာသို့အရောက်တွင် ဖောက်ခွဲတိုက်ခိုက်ခဲ့ခြင်းဖြစ်ကြောင်း PDF South Monywa၏ ထုတ်ပြန်ချက်တွင် ဖော်ပြသည်။

တိုက်ခိုက်မှုကြောင့် ပျူများထဲမှ လေးဦးသေဆုံးနိုင်ပြီး နှစ်ဦးထိခိုက်ဒဏ်ရာရရှိနိုင်ကြောင်း၊ မဟာမိတ်အဖွဲ့များ ထိခိုက်မှုမရှိကြောင်း PDF South Monywaက အသိပေးသည်။

အဆိုပါတိုက်ခိုက်မှုအား People’s Defence Force – South Monywa၊Monywa Ranger Group/Truth Army ၊Black Hunter People’s Task Force ၊Anyar Defence Force စသည့်အဖွဲ့များ ပူးပေါင်းဆောင်ရွက်ခဲ့ခြင်းဖြစ်သည်။

Public Service Announcement

ဖြစ်စဥ်နှင့်ပတ်သက်၍ PDF South Monywa တာဝန်ရှိသူ Daung Karyanက “တောပုပျူတွေ၁၂ကောင်၂ယောက်ပိုး ၆စီးနဲ့ ထွက်လာတာပါ။ ထုတ်ပြန်ထားတဲ့လမ်းပိုင်းမှာ ဒီကောင်တွေ ဓားပြတိုက် လုနေကြတာပါ။ ခြောက်ကောင်က ကျွန်တော်တို့ပွိုင့်နားမှာ လာထိုင်တာနဲ့ ဆွဲလိုက်တာပါ။ ခြောက်ကောင်လုံးလဲကျသွားပြီး လေးကောင်သေတဲ့အကြောင်း သတင်းရရှိပါတယ်ဗျ။”ဟု ပြောကြားသည်။

စစ်ကောင်စီတပ်၏ ထိခိုက်သေဆုံးမှုအခြေအနေနှင့်ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။

သြဂုတ် ၁၅ ရက် နံနက် ၂ နာရီဝန်းကျင်ကလည်း မုံရွာမြို့အဝင် မအူစစ်ဆေးရေးဂိတ်ကို လက်နက်ကြီးလက်နက်ငယ်များဖြင့် ပြောက်ကျားထိုးစစ်ဆင်ခဲ့ရာ ၄၅ မိနစ်ကျော် အဆက်မပြတ် ထိုးစစ်ဆင်မှုအတွင်း အကြမ်းဖက်စစ်သား လေးဦးသေဆုံးခဲ့သည်ဟု Chindwin Attack Forceအဖွဲ့က ထုတ်ပြန်ထားသည်။