ကရင်အမျိုးသားအစည်းအရုံး(KNU) တပ်မဟာ(၆)နယ်မြေ၌ စစ်ကောင်စီတပ်ကို တိုက်ခိုက်နေသည့် ကော်ဘရာစစ်ကြောင်းအား ပြည်သူများပံ့ပိုးကူညီလိုပါက Cobra Column Facebook Page သို့ တိုက်ရိုက်ဆက်သွယ်ကူညီပံ့ပိုးကြရန် ကော်ဘရာစစ်ကြောင်းက ယနေ့ ထုတ်ပြန်သည်။
အကြမ်းဖက် စစ်ကောင်စီနှင့် တိုက်ပွဲ ပြင်းထန်စွာ ဖြစ်ပွားလျက်ရှိသည့် ကော်ဘရာ စစ်ကြောင်းသို့ ပြည်သူများက ပံ့ပိုးကူညီပေးလျက်ရှိရာမသမာသူများမှ ကော်ဘရာစစ်ကြောင်း၏ အမည်နာမအား အလွဲသုံးစားပြုလုပ်လျက်ရှိကြောင်း ဖော်ပြထားသည်။
ကော်ဘရာစစ်ကြောင်း၏ အမှတ်တံဆိပ်၊ အမည်နာမများအသုံးပြု၍ မသမာသူလူများမှ အလှူငွေ ကောက်ခံခြင်း၊ အကောင့်တုများ ဖွင့်၍ သတင်းမှားများ ဖြန့်ဝေခြင်း ပြုလုပ်လျက်ရှိသည်ကို တွေ့ရသည်ဟုလည်း ထုတ်ပြန်သည်။
ထို့ကြောင့် ပြည်သူများ အနေဖြင့် Cobra Column Facebook Page မှ ထုတ်ပြန်သည့် သတင်းအချက်အလက်များကိုသာ ကြည့်ရှုပေးရန်နှင့်Page Messengerသို့ တိုက်ရိုက် ဆက်သွယ်ပံ့ပိုးပေးရန်ကော်ဘရာ စစ်ကြောင်းက မေတ္တာရပ်ခံခဲ့သည်။
Public Service Announcement
မသမာသူများ၏ အကောင့်များ၊ Page များမှ ထုတ်ပြန်သောသတင်းအမှားများ၊ ငွေကြေးကိစ္စများသည် ကော်ဘရာစစ်ကြောင်းနှင့် သက်ဆိုင်ခြင်းမရှိဟုလည်းထုတ်ပြန်ခဲ့သည်။
ကော်ဘရာ စစ်ကြောင်းနှင့် စစ်ကောင်စီတပ်တို့သည် မြ၀တီ – ဝေါ်လေလမ်း အနီးတဝိုက်၌ တိုက်ပွဲများ ပြင်းထန်စွာ ဖြစ်ပွားနေသည်မှာ ၂လကျော်ကြာပြီဖြစ်ပြီး အထိနာသည့် စစ်ကောင်စီတပ်သည် မြေပြင်မှ အင်အားအလုံးအရင်းဖြင့် ထိုးစစ်ဆင်နေသည့်အပြင် လေကြောင်း ပစ်ကူ၊ လက်နက်ကြီးပစ်ကူများ သုံး၍ တိုက်ခိုက်နေသည်။
