စစ်ကောင်စီ ပစ်ခတ်သည့် လက်နက်ကြီးကြောင့် အမျိုးသမီးများ အပါအဝင်လေးဦး ဒဏ်ရာရ
ချင်းပြည်နယ် ဟားခါးမြို့၌ ယနေ့နံနက်က ချင်းတော်လှန်ရေးတပ်ပေါင်းစုနှင့် စစ်ကောင်စီတပ်တို့ ၂နာရီကျော်ကြာ တိုက်ပွဲဖြစ်ပွားခဲ့ကြောင်း The Chin Journalက ဖော်ပြသည်။
ဩဂုတ် ၃၀ရက် နံနက် ၆နာရီခန့်က ဟားခါးထာရ်ရပ်ကွက်တွင် တိုက်ပွဲဖြစ်ပွားရာ စစ်ကောင်စီတပ် ပစ်ခတ်သည့် လက်နက်ကြီးကျည်သည် လူနေအိမ်အချို့ပေါ်ကျရောက်ပေါက်ကွဲခဲ့သည်ဟုဆိုသည်။
ထိုသို့ လက်နက်ကြီးကျည် ကျရောက်ပေါက်ကွဲခဲ့၍ အမျိုးသမီး သုံးဦး နှင့် အမျိုးသားတစ်ဦး ဒဏ်ရာရရှိခဲ့ကြောင်း ဖော်ပြထားသည်။
မိသားစုများ နံနက်စာစားနေစဉ် လက်နက်ကြီး ကျရောက်ပေါက်ကွဲခဲ့ခြင်းဖြစ်ပြီး ဒဏ်ရာရ သူများအား ဟားခါးဆေးရုံသို့ပို့ဆောင်ထားသည်ဟု ဆိုသည်။
Public Service Announcement
တိုက်ပွဲ၌ စစ်ကောင်စီနှင့် ချင်းပူးပေါင်းတပ်မှ ထိခိုက်ကျဆုံးရှိ၊မရှိကို စုံစမ်းနေဆဲဖြစ်သည်။ ဟားခါး CDF တာဝန်ရှိသူ တစ်ဦးထံသို့ ဆက်သွယ်ရာတွင်လည်း အဆက်အသွယ်မရသေးပေ။
ချင်းပြည်နယ် ဟားခါး – ထန်တလန်ကြားတွင်လည်း ဇူလိုင်လကုန်ပိုင်းမှ ယခု ဩဂုတ်လကုန်ပိုင်းအထိ တိုက်ပွဲများ ဆက်လက်ဖြစ်ပွားနေကြောင်း ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြီးခဲ့သည့် ရက်ပိုင်းအတွင်းက ပြောကြားထားသည်။
ဒေသတွင်း ထိုးစစ်ဆင်လာသည့် စစ်ကောင်စီတပ် များကို CNF/CNA ၊ ချင်းဒေသကာကွယ်ရေးတပ်(CDF) တပ်ဖွဲ့များ ပူးပေါင်း တိုက်ခိုက်နေခြင်းဖြစ်သည်။
