အာဏာသိမ်းတာကို ဦးဆောင်ဆန့်ကျင်သူပညာရေးဝန်ထမ်း တွေကို ရုံးမထုတ်ဘဲထောင်ချ

စစ်အာဏာသိမ်းတာကို ဆန့်ကျင်လို့ ဖမ်းဆီးခံထားရတဲ့ ဆရာ၊ ဆရာမတွေကို စစ်ကောင်စီဟာ ဒီရက်ပိုင်း မန္တလေးမှာ ဆက်တိုက်ဆိုသလို ထောင်ချနေတာတွေ့ရပါတယ်။

သြဂုတ်လအတွင်းမှာတင် အိုးဘိုထောင်မှာ အကျဉ်းချထားတဲ့ ကျောင်းဆရာ ၂ ဦးနဲ့ ဆရာမ ၁ ဦးကို ရက်ခြားကာ ဆူပူအောင်လှုံဆော်မှု ၊ အကြမ်းဖက်မှု ပုဒ်မတွေနဲ့ စစ်ကောင်စီက ထောင်ချခဲ့ပါတယ်။

အဲဒီလိုထောင်ချခံရတဲ့ ဆရာ ၊ဆရာမတွေဟာ အခြေခံပညာရေးဝန်ထမ်းများအထွေထွေ သပိတ်ကော်မတီ ရဲ့ ဗဟိုကော်မတီဝင်တွေဖြစ်တဲ့ ဆရာဦးရန်စိုးပိုင် ၊ ဆရာဦးနိုင်းသီဟကျော်နဲ့ ဆရာမ ဒေါ်သက်ဆုလှိုင်တို့ပဲဖြစ်ပါတယ်။

ဆရာ ဦးရန်စိုးပိုင်နဲ့ ဆရာဦးနိုင်းသီဟကျော် တို့ကို ထောင်ဒဏ် ၈ နှစ်ချထားပြီး ဆရာမ ဒေါ်သက်ဆုလှိုင်ကို စွဲဆိုထားတဲ့ ပုဒ်မ ၂ ခုထဲက အကြမ်းဖက်မှုအတွက် ထောင်ဒဏ် ၅ နှစ်ချထားပြီး ကျန်အမှုကိုဆက်လက်ရင်ဆိုင်ရဖို့ရှိပါတယ်။

Public Service Announcement

ဒီလိုထောင်ချရာမှာလည်း စွပ်စွဲခံရသူကို တရားရုံးထုတ်စစ်ဆေးတာမရှိဘဲ မျက်ကွယ်ထောင်ချတာမျိုးကို စစ်ကောင်စီက လုပ်ဆောင်တယ်လို့သိရပါတယ်။

ဒါအပြင်ကျောင်းသားသမဂ္ဂဥက္ကဋ္ဌဟောင်း ကိုနောင်ထက်အောင်ကိုလည်း သြဂုတ်လထဲမှာတင် ဆူပူအောင်လှုံဆော်မှုနဲ့ ထောင် ၃ နှစ်ချထားပါတယ်။