ရဲတစ်ဦးသေပြီးလက်နက်နှင့်ကျည်များ သိမ်းဆည်းရရှိ
မကွေးတိုင်း၊ မြိုင်မြို့နယ်တွင် ရေနံမြေရဲကင်းစခန်းမှ ကင်းပတ်ထွက်လာသည့် ရဲ ၈ ဦးအား တိုက်ခိုက်ခဲ့ရာ ရဲတစ်ဦးသေဆုံးပြီး သေနတ်တစ်လက်နှင့်ကျည်များ သိမ်းဆည်းနိုင်ခဲ့ကြောင်း မြိုင်မြို့နယ် ကျေးရွာများ တော်လှန်ရေးတပ်ဦး MVRFက သတင်းထုတ်ပြန်သည်။
ယမန်နေ့ (စက်တင်ဘာလ ၁၄ ရက်နေ့)က မြိုင်မြို့နယ် Well 2 ရေနံမြေရဲကင်းစခန်းမှ ကင်းပတ်ထွက်လာသည့် ရဲ ၈ ဦးအား ပခုက္ကူခရိုင်တပ်ရင်း အမှတ်( ၆ ) – MVRF နှင့် Eagle Fighter( MVRF အဖွဲ့ဝင်) အဖွဲ့တို့ ပူးပေါင်းတိုက်ခိုက်ခဲ့ခြင်းဖြစ်သည်။
အဆိုပါတိုက်ပွဲတွင် ရဲ ၁ ဦး သေဆုံးပြီး ၁ဦးဒဏ်ရာပြင်ပြင်းထန်ထန်ရသွားကြောင်း၊ ကျန်ရဲများ Well 2 စခန်းအတွင်း ပြန်လည်ထွက်ပြေးသွားခဲ့သည်ဟု MVRF ကဆိုသည်။
သေဆုံးရဲမှာ ရဲတပ်သား ရှင်းခန့်သူ ဖြစ်ပြီး ကိုယ်ပိုင်အမှတ် လ ၂၇၉၀၂၃ ကိုင်ဆောင်သူဖြစ်ကာ ထိုရဲထံမှ G3 တစ်လက်၊ကျည် ၁၁၅ တောင့်၊ဘောက်အပို ၁ ခု ၊ ငွေသား ၁ သိန်းကျော် သိမ်းဆည်းရမိခဲ့ကြောင်း၊ MVRF ၏ရဲဘော် ၁ ဦး ဒဏ်ရာ ( မစိုးရိမ်ရ) ရရှိခဲ့ကြောင်း MVRF က အသိပေးသည်။
ဖြစ်စဥ်နှင့်ပတ်သက်၍ MVRFထံ ဆက်သွယ်မေးမြန်းရန်ကြိုးစားသော်လည်း ဆက်သွယ်၍ မရသေးပေ။
မကွေးတိုင်း၊ မြိုင်မြို့နယ်သည် စစ်ကောင်စီတပ်အား လက်နက်ကိုင်ခုခံမှုအားကောင်းရာဒေသဖြစ်ပြီး စစ်ကိုင်းတိုင်းPDFများနှင့်ပါ ပူးပေါင်းတိုက်ခိုက်လျက်ရှိသည်။