မုံရွာ – မန္တလေးလမ်းတွင် စစ်ကောင်စီတပ်ယာဉ်တန်း တိုက်ခိုက်ခံရပြီး စစ်ကားတစ်စီးပျက်စီး

စစ်ကိုင်းတိုင်း၊ မုံရွာ – မန္တလေး လမ်းမကြီးပေါ်တွင် စစ်ကောင်စီတ​ပ်၏ ယာဉ်သုံးစီးအား မိုင်းဆွဲတိုက်ခိုက်ခဲ့ပြီး ထိခိုက်သေဆုံးမှုရှိနိုင်ကာ တစ်စီးပျက်စီးသွား၍ ကြိုးဖြင့်ဆွဲကာ သယ်ဆောင်သွားကြောင်း People’s Defence Force – South Monywa အဖွဲ့က သတင်းထုတ်ပြန်သည်။

ယမန်နေ့ (စက်တင်ဘာလ ၁၆ ရက်) ည ၁ဝ နာရီ ၄၅ မိနစ်ခန့်က မုံရွာ – မန္တလေးလမ်းမကြီး၏ မုံရွာ-ချောင်းဦးလမ်းပိုင်းတစ်နေရာ၌ စစ်ကောင်စီတပ်ယာဉ် သုံးစီးသည် အလျင်အမြန်မောင်းနှင် လာစဥ် မိုင်းမြှုပ်ထားသည့်နေရာအရောက် မိုင်းခွဲတိုက်ခိုက်ခဲ့ကြောင်း PDF South Monywa၏ ထုတ်ပြန်ချက်တွင် ဖော်ပြသည်။

နောက်ဆုံးယာဉ်မှာ မိုင်းဆံများမှန်၍ မှန်များမှာလည်း တစ်စစီကြေမွပျက်စီးသွားပြီးရှေ့ဆက်မသွားတော့ဘဲ ချက်ချင်းထိုးရပ်သွားခဲ့ကြောင်း၊ အဆိုပါ ယာဉ်အား ရှေ့ကားများက ကြိုးများဖြင့်တုပ်နှောင်၍ ဆွဲခေါ်သယ်ဆောင်သွားခဲ့​ကြောင်း PDF South Monywaက အသိပေးသည်။

ဖြစ်စဥ်နှင့်ပတ်သက်၍ PDF South Monywa အဖွဲ့ တာဝန်ရှိသူ Daung Karyan က “ကားတွေက စစ်ကိုင်းကနေမုံရွာကိုလာတာပါ။သတင်းကမရကြဘူး။ ကျွန်တော်တို့တောင် ချောင်းဦးကျော်မှသတင်းရတာ။ မိုင်းထိပြီး ကားကိုမောင်းမရတော့လို့ ကြိုးနဲ့ဆွဲသွားရတာပါဗျ။”ဟု ပြောကြား သည်။

Public Service Announcement

စစ်ကောင်စီတပ်သားများ ထိခိုက်သေဆုံးမှုများနိုင်သည်ဟု PDF South Monywa က ခန့်မှန်းသည်။

PDF- South Monywaအဖွဲ့သည် ယမန်နေ့ (စက်တင်ဘာ ၁၆ ရက်) မွန်းလွဲ ၁ နာရီ ၂၅မိနစ်ခန့်ကလည်း မုံရွာမြို့နယ် တောပုရွာအနီး၌ ပျူစောထီးများက PDFအယောင်ဆောင်ပြီး လမ်းသွားလမ်းလာပြည်သူများအား အကြမ်းဖက်စစ်ဆေးနေ၍ သွားရောက်ပစ်ခတ်တိုက်ခိုက်ခဲ့သေးသည်။