စစ်ကောင်စီတပ်ဖွဲ့ဝင်နှစ်ဦး လက်နက်နှင့်အတူ အလင်းဝင်လာဟု ကန်ပက်လက် CDF အသိပေး

စစ်ကောင်စီတပ်နှင့် ရဲမှ လက်နက်နှင့် CDM ပြုလုပ်လာသူ ၆ဦးထိရှိပြီး လက်နက်မဲ့ CDM ပြုလုပ် သူအများအပြားရှိဟု တာဝန်ရှိသူပြော

ချင်းပြည်နယ် ကန်ပက်လက်နယ်တွင် တာဝန်ထမ်းဆောင်နေသည့် စစ်ကောင်စီတပ်သားတစ်ဦးနှင့် ရဲသားတစ်ဦးတို့ အလင်းဝင်လာကြောင်း ကန်ပက်လက်မြို့နယ် ချင်းကာကွယ်ရေးတပ်(CDF) က သတင်းထုတ်ပြန်သည်။

တပ်သား နေသူအောင်နှင့် ရဲတပ်သား ဗန်ဒိန်းတို့က အလင်းဝင်လိုကြောင်း ဆက်သွယ်လာ၍ ကန်ပက်လက်CDFက သွားရောက်ကြိုဆို ခေါ် ဆောင်ခဲ့ကြောင်း၊ လက်နက်နှစ်လက်နှင့် ကျည် ဘောက်များ၊ ကျည်များပါလာကြောင်း ထုတ်ပြန်ခဲ့ပြီး ၎င်းတို့အား သတ်မှတ်ထားသည့် ဂုဏ်ပြုချီးမြှင့်ငွေများ ပေးအပ် ကာလွတ်မြောက်နယ်မြေသို့ ပို့ဆောင်ပေးခဲ့သည်ဟု ဆိုသည်။

ရဲတပ်သားဗန်ဒိန်းသည် စက်တင်ဘာ ၂၂ရက်က CDM ပြုလုပ်လာခြင်းဖြစ်ပြီး တပ်သား နေသူအောင်သည် စက်တင်ဘာ ၂၄ရက်တွင် CDM ပြုလုပ် လာခြင်းဖြစ်သည်ဟု ကန်ပက်လက် CDF တာဝန်ရှိသူတစ်ဦးက ပြောသည်။

ရဲတပ်သား ဗန်ဒိန်းသည် ကန်ပက်လက်မြို့မှ ရဲစခန်းမှဖြစ်ပြီး စစ်သားမှာ မတူပီဗျူဟာ၏ ကွပ်ကဲမှုအောက်ရှိ ခလရ(၁၄၀) တပ်မှ ကန်ပက်လက်နယ်၌ ရောက်ရှိ တာဝန်ထမ်းဆောင်နေသူ ဖြစ်သည်ဟုဆိုသည်။

Public Service Announcement

“လက်နက်နဲ့ ဝင်လာတဲ့ဟာက အခုထိ ၆ယောက်ပြီ။ လက်နက်မဲ့ဝင်လာတာတော့ တော်တော် လေးကို အရေအတွက်များနေပါပြီ” ကန်ပက်လက် CDF တာဝန်ရှိသူက ပြောသည်။

နေရာဒေသအသီးသီးရှိ ကာကွယ်ရေးတပ်ဖွဲ့များ နှင့် ရင်ဆိုင်နေရသည့် စစ်ကောင်စီတပ်နှင့် ရဲမှ တပ်ဖွဲ့ဝင် အများအပြားသည် စစ်ကောင်စီတပ်ကို စွန့်ခွာပြီး ပြည်သူ့ဘက် ရပ်တည်လာမှုများ တစ်နေ့ထက် တစ်နေ့ ပိုမိုများပြားလျက်ရှိသည်။

“ဝင်လာတဲ့သူများလာတယ်ဆိုတာက သူတို့တပ်ရဲ့ အခြေအနေကို သူတို့ကိုယ်တိုင် သဘောပေါက်လာတဲ့အတွက်ကြောင့် သူတို့ အဲဒီမှာ ဆက်နေတယ်ဆိုရင် လူတစ်ဦးတစ်ယောက် ကောင်းစားဖို့ သူတို့ရဲ့ ခေါင်းဆောင် ကောင်းစားဖို့အတွက်ရယ် ကိုယ်ကျိုးရှာသမားတွေ ကောင်းစားဖို့ အတွက် အသက်နဲ့ ရင်းပြီး ကာကွယ်ပေးနေရတာဖြစ်တယ် ပြီးတော့ သူတို့ ဒီမှာ ဆက်ပြီး တာဝန်ထမ်းဆောင်နေရအုံးမယ်ဆိုရင်လည်း ဘာမှထူးခြားလာတာမရှိဘူး။ ပြည်သူရဲ့ မျက်မုန်းကျိုးတာပဲ ခံရမယ်ဆိုတဲ့ အသိတရားတွေ အားလုံးနီးပါးမှာ သူတို့ စစ်သားပဲဖြစ်ဖြစ် ရဲပဲ ဖြစ်ဖြစ် ဒီလို ဝင်လာတဲ့ဟာများတယ်။ သူတို့ အလကား သပ်သပ် အသေမခံနိုင်တော့တဲ့ အနေအထားတွေ ဖြစ်လာတယ်လို့ သုံးသပ်မိတာပေါ့”ဟု ကန်ပက်လက် CDF တာဝန်ရှိသူက ပြောသည်။