စစ်ကောင်စီတပ်သောင်းကျန်းနေ၍ စစ်ကိုင်းတိုင်း၊ ရွှေဘို – မန္တလေးလမ်းမကြီးအပါအဝင် ဝက်လက်မြို့နယ်အတွင်းရှိ လမ်းပိုင်း ငါးခုအား ဖြတ်သန်းသွားလာခြင်းလုံးဝမပြုရန် တိုက်နယ်တာဝန်ခံများနှင့် ဝက်လက်မြို့နယ် ပြည်သူ့ကာကွယ်ရေးအဖွဲ့က သတိပေးကြေညာသည်။
ရွှေဘို – မန္တလေးကားလမ်းမကြီးကိုအသုံးပြုမည့် ခရီးသွားပြည်သူများအနေဖြင့် ရွာသာကြီးကျေးရွာ၊ လှတောရွာနှင့် စိုင်နိုင်ကြီးကျေးရွာများတွင် စစ်ကောင်စီတပ်များ ရောက်ရှိလာပြီး ခရီးသွားပြည်သူများအား တားဆီးစစ်ဆေး၍ အကြမ်းဖက်မှုများပြုလုပ်နေသည်။
ထို့ကြောင့် ယနေ့ (စက်တင်ဘာလ ၂၉ ရက်) နံနက် ၁၁ နာရီမှစတင်ပြီး မည်သည့်ယာဥ်၊ မည်သည့်လိုင်းကားမျှ တစုံတရာ မထုတ်ပြန်မီအချိန်အထိ အုန်းတောမှ ရွှေဘိုကားလမ်း၊ စိုင်နိုင်ကွေ့မှ ဟန်လင်းလမ်း၊ ရွာသာကြီးမှ အရာတော်လမ်း၊ လှတောမှ ဝက်လက်လမ်း၊ ရွာသာကြီးမှ ဝက်လက်လမ်း စသည့်လမ်းပိုင်းများအား ဖြတ်သန်းသွားလာခြင်း မပြုရန် တားမြစ်လိုက်ကြောင်း ဝက်လက်မြို့နယ် ပြည်သူ့ကာကွယ်ရေးအဖွဲ့၏ ထုတ်ပြန်ချက်တွင် ဖော်ပြသည်။
ထို့အပြင် စိုင်နိုင်၊ ရွာသာကြီး၊လှတော၊ ရွှေပန်းကုန်း စသည့်တိုက်နယ်တာဝန်ခံများကလည်း ပူးပေါင်းကာ ထုတ်ပြန်ခဲ့ခြင်းဖြစ်ပြီး သတိပေးထားသည့်ကြားက သွားလာပါက ကာကွယ်ရေးအဖွဲ့များက လုံးဝတာဝန်ယူမည်မဟုတ်ကြောင်း ဝက်လက်မြို့နယ် ပြည်သူ့ကာကွယ်ရေးအဖွဲ့က အသိပေးသည်။
စစ်ကောင်စီတပ်သည် စက်တင်ဘာ၂၅ ရက်မှစတင်ကာ ဝက်လက်မြို့နယ်၊ ရွှေဘို- မန္တလေးလမ်းပိုင်းရှိ ရွာသစ်ကြီးကျေးရွာကို အကြမ်းဖက်ပစ်ခတ် တပ်စွဲထားပြီး ဖမ်းဆီးသတ်ဖြတ်မှုများ ပြုလုပ်နေ၍ ဒေသခံအများအပြား ထွက်ပြေးတိမ်းရှောင်နေရသည်။