ရှမ်းပြည်နယ်မြောက်ပိုင်း မန်တုံမြို့ကို ကချင်လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်(PDF) ပူးပေါင်းအဖွဲ့၀င်ရောက်လာပြီး စစ်ကောင်စီတပ်နှင့် ရဲစခန်းကို ယမန်နေ့က တိုက်ခိုက်ခဲ့ကြောင်း အဆိုပါမြို့ဒေသခံက ပြောသည်။
စက်တင်ဘာ ၂၉ရက် နံနက်ပိုင်းကစတင်၍ မန်တုံအခြေစိုက် ခလရ(၁၃၀) တပ်ရင်းကို KIA/PDF ပူးပေါင်းတပ်က တိုက်ခိုက်ခဲ့ခြင်းဖြစ်သည်။
“ထိခိုက်တာတော့ မကြားမိဘူး။ သူတို့ ဝင်တဲ့အချိန် အကုန်လုံးရှောင်ထွက်တာ စခန်းက လူတွေက။ စခန်းမီးလောင်တာတော့ ဟုတ်တယ်။ သူတို့က အဓိက လာပစ်တာ တပ်ကို လာပစ်တာ။ ပစ်ပြီးတော့ ပြန်ဆင်း၊ ဆင်းပြီး ရဲစခန်းမီးရှို့ပြီးမှ ထွက်သွားတယ်။” ဟု မန်တုံဒေသခံက ပြောသည်။
မန်တုံရှိ တပ်စခန်းနှင့် ရဲစခန်း တိုက်ခိုက်မှု ဖြစ်စဉ်နှင့်ပတ်သက်ပြီး မေးမြန်းရန် KIA သတင်းနှင့် ပြန်ကြားရေး တာဝန်ခံသို့ ဆက်သွယ်ရာအဆက်အသွယ်မရသေးပေ။
အဆိုပါ ဒေသ၌ တအာင်းတပ်(TNLA) အဖွဲ့လည်းလှုပ်ရှားမှုရှိသည့် ဒေသ ဖြစ်သည်။
“သူတို့(TNLA)အခြေအနေက အေးဆေးပါ။ သူတို့ က မြို့ကို ထိမှာကြောက်လို့ ဘာမှ မလှုပ်ရှားဘူးလေ။ သူတို့က ကိုယ့်ရဲ့ကိုယ်ပိုင်အုပ်ချုပ်ခွင့်ရမြို့ဆိုတော့လေ”ဟု ဒေသခံက ပြောသည်။
TNLA အနေဖြင့် အာဏာမသိမ်းမီက စစ်ကောင်စီတပ်နှင့်ထိတွေ့တိုက်ပွဲများစွာရှိခဲ့သည့် တပ်ဖြစ်သည်။ အာဏာသိမ်းပြီးနောက်ပိုင်းတွင် စစ်ကောင်စီတပ်နှင့် TNLA တို့အကြား ထိတွေ့တိုက်ပွဲဖြစ်ပွားမှုနည်းပါးခဲ့သည်။