မြန်မာတွင် ဖြစ်ပွားနေသော ဆိုးရွားသည့်ဖြစ်ရပ်များကို ဆက်လက်လျစ်လျူမရှုရန် နိုင်ငံတကာကို သံအမတ်ကြီး ပြော

နိုင်ငံတကာအသိုက်အဝန်းသည် မြန်မာနိုင်ငံ၌ ဖြစ်ပွားနေသည့် ဆိုးရွားသည့်ဖြစ်ရပ်များကို ဆက်လက်လျစ်လျူမရှုသင့်ကြောင်း သံအမတ်ကြီး ဦးကျော်မိုးထွန်းက ကုလသမဂ္ဂ၌ ပြောသည်။

မြန်မာစစ်တပ်၏ အုပ်ချုပ်မှုကို မရပ်တန့်မချင်း ဆိုးရွားယုတ်မာသည့် ပြစ်မှု ကျူးလွန်မှုကို ရပ်တန့်မည်မဟုတ်ကြောင်း သံအမတ်ကြီးက ယမန်နေ့တွင် ကျင်းပသော ကုလညီလာခံသို့ ပြောသည်။

လူ့အခွင့်အရေးကောင်စီသို့ တင်သွင်းသည့် လူ့အခွင့်အရေးဆိုင်ရာ မဟာမင်းကြီးရုံး၏ အစီရင်ခံစာတွင် မြန်မာစစ်တပ်သည် နိုင်ငံကို ရေရှည်ကောင်းမွန်စွာ အုပ်ချုပ်နိုင်စွမ်းမရှိဟု ဖော်ပြထားသည်။

ဆက်လက်ပြီး ကျရှုံးနေသည့် စစ်တပ်အုပ်ချုပ်မှုကို ခိုင်မာစွာ ဆန့်ကျင်မှုများကြောင့် စစ်တပ်အုပ်ချုပ်ရေး ယန္တရားသည် နိုင်ငံတစ်ဝှမ်းနေရာဒေသမျိုးစုံ၌ ပြိုကွဲပျက်စီးနေကာ စစ်တပ်၏ တစ်ခုတည်းသော အာဏာဆုပ်ကိုင်မှုနည်းလမ်းသည် မြန်မာပြည်သူများအပေါ် ရက်စက်စွာသတ်ဖြတ်မှုနှင့် ခြိမ်းခြောက်မှုသာ ဖြစ်ကြောင်း မဟာမင်းကြီးရုံးက အစီရင်ခံထားသည်။

Public Service Announcement

အဆိုပါအစီရင်ခံစာတွင် နိုင်ငံတကာအသိုက်အဝန်းက မြန်မာပြည်သူများအား ကူညီထောက်ပံ့ရန်၊ စစ်တပ်ကို အဆင့်ဆင့်အရေးယူဆောင်ရွက်ရန်၊ စစ်တပ်ကို ငွေကြေးအရ ဆက်ဆံမှုမပြုဘဲ အဆက်အသွယ်ဖြတ်တောက်ရန်နှင့် လက်နက်ကုန်သွယ်မှုပိတ်ပင်ရန် တိုက်တွန်းထားသည်။