လိင်ဖျော်ဖြေရေးအရုပ်နှစ်ရုပ်ကိုရန်ကုန်မြို့၊ ရွှေတိဂုံဘုရား သိင်္ဂုတ္တရကုန်းသို့ယူဆောင်လာ၍ မယ်တော်အဖြစ်ရင်ငွေ့ခိုလှုံစည်ဆိုကာအသက်သွင်းပွဲပြုလုပ် ခြင်းအပေါ် ပြည်သူများက အပြင်းအထန်ဝေဖန်နေကြသည်။
နိူင်ငံတကာတွင်လိင်ဖျော်ဖြေရေးအရုပ်အဖြစ်အသုံးပြုနေသောအရုပ်နှစ်ရုပ်ကိုလောကီဝိဇ္ဇာဓိုရ် မိန်းမလှဒေဝီအထက်ဂိုဏ်းချုပ်ကြီးဆိုသူက တစ်ရုပ်လျှင် ဒေါ်လာ၂၄၀ဝ ဖြင့် ဝယ်ယူခဲ့ကြောင်း၊ လူအစစ်နှင့်တူ၍ နည်းပညာကိုကြည့်ကာ မှာယူခဲ့ခြင်းဖြစ်ကြောင်း၎င်း၏ ဖေစ်ဘွခ်တွင်ရေးသားထားသည်။ ထိုသူကဦးဆောင်၍ ယနေ့ (အောက်တိုဘာ၂၂ ရက်)နံနက်ပိုင်းက ရွှေတိဂုံဘုရား၊ သိင်္ဂုတ္တရကုန်း၌ အဆိုပါလိင်ဖျော်ဖြေရေးအရုပ်နှစ်ရုပ်အား ရင်ငွေ့လှုံအသက်သွင်းခြင်းအခမ်းနားပြုလုပ်သွားခဲ့ပြီး ထိုင်ကန်တော့သူများပင် ရှိခဲ့ကြောင်း အဆိုပါပွဲ၏ ဓါတ်ပုံများတွင်တွေ့ရသည်။
“Sex Doll ကို ရွှေတိဂုံထိ သယ်သွားပြီး ဘာမယ်တော် ညာမယ်တော်တွေနာမည်ပေးပြီး သာသနာဖျက်နေပြီနော်။ မယ်သီလရှင်တွေ ဘုန်းကြီးတွေပါ ထိုင် ကန်တော့နေတာ။
အစကတော့ ရယ်စရာပဲ။ခုက သာသနာညှိုးနွမ်းစေတာ။ ဂေါပကတွေကလည်း ထဘီလေး နည်းနည်းတိုရင်တော့ ထပြောပြီး ခုကျ ကြည့်ကောင်းကောင်းနဲ့ကြည့်နေတယ်။”ဟု ပြည်သူတစ်ဦးကလည်း လူမှုကွန်ရက်တွင် ရေးသားထားသည်။
ရွှေတိဂုံဘုရားဂေါပကအဖွဲ့သည် ဘောင်းဘီအတို၊ အရှည်ဖြင့်ပင် ဘုရားပေါ်သို့တက်ခွင့်မပြုရာ ယခုကဲ့သို့ လိင်ဖျော်ဖြေရေးအရုပ်များ ဘုရားပေါ်ရောက်လာ၍ စစ်ကောင်စီ၏ ဂေါပကအဖွဲ့ ကိုလည်း ပြည်သူများက ဝေဖန်နေကြသည်။
“ဆီလီကွန် မိန်းမအရုပ်ကို မယ်တော်ပုံဖမ်းကိုးကွယ်တာ မင်းတို့ကိစ္စ ရွှေတိဂုံဆံတော်ရှင်စေတီတော်မြတ်ကြီးထိ ရင်ငွေ့လှုံဖို့သယ်လာတာတော့ ငါတို့ ကိစ္စဖြစ်ပြီ။ဒီအရုပ်တွေတင် မကဘူး သာသနာအဆုံးမမှာမရှိတဲ့ဘယ်အရုပ်မှတင်ခွင့်ကို မရှိတာ။ သာသနာရေးဌာနကဘာလဲ ဘောင်းဘီတိုနေရင်တောင် နပန်းလုံးမတတ်လိုက်ဆွဲ ဘောင်းဘီအရှည်ဆို အထက်ပစ္စယံတက်ခွင့်မရှိဘူးတဲ့ sex doll ကတော့ ဝတ္တ
ကမြေထဲ ခြိမ့်ခြိမ့်သဲလုပ်နေတာ။ ထေရ်ရဝါဒဗုဒ္ဓသာသနာအထွဋ်မြတ်နယ်မြေမှာရှက်စရာကောင်းလှပါတယ်။”ဟု ပြည်သူတစ်ဦးက လူမှုကွန်ရက်တွင် ရေးသားထားသည်။
စစ်ကောင်စီအာဏာသိမ်းပြီးနောက် စီးပွားရေးအပါအဝင် ကဏ္ဍာပေါင်းစုံ၌ အဖက်ဖက်ကကျဆင်းလာကာ ပြည်သူများပိုမိုကြပ်တည်းခက်ခဲလာချိန်တွင်လိမ်လည်သူများပိုများလာကြောင်းလည်းပြည်သူအချို့ကပြောသည်။
“စစ်ကောင်စီက သူ့လူတချို့ကို ပြည်သူတွေအာရုံစိုက်မှုရအောင်ရူးရူးနှမ်းနှမ်းအလုပ်တွေလုပ်ခိုင်းပြီး. ပြီးမှသူတို့က ဖြေရှင်းတယ်၊ဘာသာ သာသနာသန့်ရှင်းရေးအတွက်အရေးယူပြတယ်ဆိုတာမျိုးလုပ်ချင်လို့ ဇာတ်လမ်းဆင်တာတောင်ဖြစ်ရင်ဖြစ်နေမှာ ။ အခုနိုင်ငံအနှံ့မှာတော်လှန်ရေးအရှိန်မြှင့်လာတာမို့ ပြည်သူတွေကိုတော်လှန်ရေးဘက်အာရုံမရောက်အောင် အာရုံပြောင်းတာတွေထဲကတစ်ခုလည်းဖြစ်နိုင်တယ် ။ သူတို့ကအမြဲအဲလိုလုပ်တာ ။ဘယ်သူတွေပေါက်ကရလုပ်နေလဲတစ်ချက်ကြည့်ပြီး သိပြီဆိုရင် ပြည်သူတွေအဲကိစ္စအတွက်အချိန်ကုန်မခံဘဲ ပိုအရေးကြီးတဲ့တော်လှန်ရေးမှာပိုအာရုံစိုက်စေချင်တယ်။အရူးတွေအတွက်အချိန်ကုန်မခံကြပါနဲ့ “ဟု တော်လှန်ရေးတပ်ဖွဲ့ဝင်တစ်ဦးကလည်းပြောသည်။