သီတင်းကျွတ်လပြည့်နေ့ ရွှေတိဂုံဘုရားရင်ပြင်ပေါ်တွင် “အရေးတော်ပုံအောင်ရမည်”ဘန်နာဖြင့် လူထုလှုံ့ဆော်မှုပြုလုပ်

ရန်ကုန်မြို့ ရွှေတိဂုံဘုရားရင်ပြင်တော်ပေါ်တွင် ယနေ့ (အောက်တိုဘာ ၉)သီတင်းကျွတ် လပြည့်နေ့၌ တော်လှန်လူငယ်များက “အရေးတော်ပုံ အောင်ရမည်“ စာသားပါ ဘန်နာကိုင်ဆောင်၍ လူထုလှုပ်ရှားမှု ပြုလုပ်ခဲ့သည်။

ယင်းလူထုလှုပ်ရှားမှုကို Yangon Revolution Force – YRF ၏ Soft Strike Community မှ လူငယ်ရဲဘော်များ လုပ်ဆောင်ခဲ့ကြခြင်းဖြစ်ပြီး ရွှေတိဂုံဘုရားရင်ပြင် ၊ မုခ်ဦးနှင့် ဂိတ်ဝများတွင် စစ်ကောင်စီဝင်များ အင်အားတိုးချဲ့နေသည့်ကြားမှ အရဲစွန့် ကြိုးပမ်းခဲ့ခြင်းဖြစ်ကြောင်း YRF အဖွဲ့က ဆိုသည်။

ယခုကဲ့သို့ အများပြည်သူများအလယ်တွင် ကြိုးစားပုံဖော်ခဲ့ရခြင်းမှာ လူထုအားကို မုချ ယုံကြည်၍ ဖြစ်ပြီး တစ်နည်းအားဖြင့် လူထုအခြေပြု တော်လှန်နေသည့် “ဤအရေးတော်ပုံကြီး အောင်မှသာလျှင်“ ကျွန်ုပ်တို့အားလုံး၏ အိမ်မက်များ ၊ တောင်းဆုများ ပြည့်ဝမည်သာ ဖြစ်သည်ကို သတိချပ်စေသောကြောင့် ဖြစ်ကြောင်း YRF က ဖော်ပြခဲ့သည်။

ရွှေတိဂုံဘုရားတွင် စစ်ကောင်စီ၏ လုံခြုံရေးအထပ်ထပ်၊ အန္တရာယ်အထပ်ထပ်ကြားမှ လှုပ် ရှားလုပ်ဆောင်ရခြင်းအတွက် ဓာတ်ပုံမှတ်တမ်းပြည့်စုံစွာ မရရှိမှုအပေါ် နားလည်ပေးရန်လည်း လူထုအား YRF က မေတ္တာရပ်ခံ တောင်းဆိုခဲ့သည်။

Public Service Announcement