'/%3E%3C/svg%3E){kind=small}
ပျူစောထီးများနှင့် သုံ့ပန်းများသာ စစ်ကောင်စီဖမ်းစီးသွားဟုဆို
ပျူစောထီးများနှင့် သုံ့ပန်းများသာ စစ်ကောင်စီဖမ်းစီးသွားဟုဆိုစစ်ကိုင်းတိုင်း ပုလဲမြို့နယ်ပြည်သူ့အုပ်ချုပ်ရေးအဖွဲ့ရုံးကို စစ်ကောင်စီတပ် လေကြောင်းမှ စီးနင်းတိုက်ခိုက်မှုအတွင်း ပြည်သူ့အုပ်ချုပ်ရေးနှင့်ကာကွယ်ရေးအဖွဲ့ဝင်များ တစ်ဦးမှမထိခိုက်ခဲ့ဘဲ ပျူစောထီးများနှင့် သုံ့ပန်းများသာ ဖမ်းမိသွားကြောင်း ပုလဲမြို့နယ်ပြည်သူကာကွယ်ရေးအဖွဲ့ တာဝန်ရှိသူတစ်ဦးက People’s Springသို့ ပြောသည်။
“သူတို့(စစ်ကောင်စီ) ဖမ်းသွားတဲ့သူတွေက ကျွန်တော်တို့ ဖမ်းဆီးထိန်းသိမ်းထားတဲ့ ပျူစောထီးတွေပါမယ်။ သုံ့ပန်းအချို့နဲ့ ခိုးဆိုးလုယက် တရားခံတွေ။ သူတို့ လေကြောင်းကနေ လူမချခင် ကျွန်တော်တို့ ရှောင်နိုင်ခဲ့ကြတယ်”ဟု ပုလဲမြို့နယ်ပြည်သူကာကွယ်ရေးအဖွဲ့ တာဝန်ရှိသူတစ်ဦးက ပြောသည်။
ပုလဲမြို့နယ်ပြည်သူ့အုပ်ချုပ်ရေးရုံးကို စစ်ကောင်စီတပ်က ယမန်နေ့(အောက်တိုဘာ ၂၅ရက်) ညနေ ၄နာရီခန့်တွင် Mi 35 နှစ်စင်းဖြင့် အင်အားအများအပြားချပြီး စီးနင်းခဲ့ခြင်းဖြစ်သည်။
ပြည်သူ့ကာကွယ်ရေးရဲဘော်များထံမှ လေကြောင်းသတိပေးချက် ချက်ချင်းရ၍ ပြည်သူ့အုပ်ချုပ်ရေးရုံး တာဝန်ရှိသူများက ဖမ်းဆီးထားသည့် ပျူများနှင့် သုံ့ပန်းများပါ ကားတစ်စီး၊ သုံးဘီးတစ်စီးဖြင့် တိမ်းရှောင်ခဲ့ကြသည်။ သို့သော် ပျူစောထီးများနှင့် သုံ့ပန်းများလိုက်ပါလာသည့် သုံးဘီးသည် စစ်ကောင်စီစစ်ကြောင်းနှင့် တိုးပြီး အဖမ်းခံလိုက်ရခြင်းဖြစ်သည်။
Public Service Announcement
“ပအဖ(ပြည်သူ့အုပ်ချုပ်ရေးအဖွဲ့)တွေရော၊ ပကဖ (ပြည်သူ့ကာကွယ်ရေးအဖွဲ့)တွေရော၊ ပလဖ(ပြည်သူ့လုဲခြုံရေးအဖွဲ့)တွေပါ တစ်ယောက်မှ အဖမ်းမခံရဘူး”ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးက ဖြေကြားသည်။
“မအလ အယုတ်တမာတွေလို ပုလဲ(ပအဖ)၊( ပကဖ)က ထင်ရာမြင်ရာ ညှင်းပမ်းနှိပ်စက် သတ်ဖြတ်သလိုမျိုး မလုပ်ဘူး။ ပျူတွေကိုလည်း လူ့အခွင့်အရေးနဲ့အညီ တရားစီရင်ရေး၊ ဆေးစောက်ရှောက်မှုအပြည့်အပြင် ဝန်ထမ်းများနဲ့အတူ စားသောက်တာကစလို့ အပြည့်ဝပေးထားပြီး လူသားတစ်ယောက်ရဲ့ အခွင့်ရေးကို ပြည့်ပြည့်ဝဝကောင်းမွန်စွာ နေထိုင်စေခဲ့ခြင်းဖြစ်တယ်။ တချို့ အချုပ်သားများက လူသတ်မှု၊ ခိုးမှုများပါ ရှိနေလို့ အချုပ်ခန်းမှာထည့်ထားခြင်းဖြစ်တယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
စစ်ကောင်စီတပ်ဖမ်းဆီးသွားသော ပျူစောထီးနှင့် စစ်သုံ့ပန်းအရေအတွက်မှာ ၁၂ဦးထက်မနည်းရှိသည်ဟု ဆိုသည်။ စစ်ကောင်စီတပ်သည် ယနေ့(အောက်တိုဘာလ ၂၆ရက်) နံနက်အထိ ပုလဲမြို့နယ်ပြည်သူ့အုပ်ချုပ်ရေးရုံးနေရာတွင် တပ်စွဲထားဆဲဟု ပြည်သူ့ကာကွယ်ရေးရဲဘော်တစ်ဦးက ပြောသည်။
