ဖားကန့်မြို့နယ် အနန့်ပါဒေသတွင်လေကြောင်းတိုက်ခိုက်ခံရမှုကိုလက်တုံ့ပြန်သောအားဖြင့်ထားဝယ်-မြိတ် ကားလမ်းမပေါ်တွင် စစ်ကောင်စီတပ်ကိုယနေ့(အောက်တိုဘာ ၂၈)နှစ်ကြိမ်တိုက်ခိုက်ခဲ့ကြောင်း ကစယ်ဒိုဖယ်ဒရယ်စစ်ကြောင်းကသတင်းထုတ်ပြန်သည်။
ထားဝယ်မြို့မှမြိတ်မြို့သို့ယနေ့မနက် ၆နာရီခွဲခန့်ကမောင်းလာသည့် စစ်ကောင်စီတပ်ကား ၁၂ စီးပါသည့်ယာဉ်တန်းကိုမြိတ်- ထား၀ယ်ပြည်ထောင်စုလမ်းမကြီးပေါ်ရှိ သရက်ချောင်းမြို့နယ်၊ ပိတောက်ကြီးရွာနှင့်ပိတောက်ငယ်ရွာကြားတွင် ကစယ်ဒိုဖယ်ဒရယ်စစ်ကြောင်းက မိုင်းဆွဲတိုက်ခိုက်ခဲ့ရာ စစ်ကားနှစ်စီး လမ်းဘေးထိုးကျပျက်စီးပြီး စစ်သား ၂ဦး သေဆုံးကာ အများအပြား ဒဏ်ရာရရှိခဲ့သည်ဟု ကစယ်ဒိုဖယ်ဒရယ်စစ်ကြောင်းကအသိပေးသည်။
ထိုအပြင် ညနေ ၄နာရီခန့်တွင် လမ်းကင်းယူထားသည့် စစ်ကောင်စီတပ်ကင်းများကို ကစယ်ဒိုဖက်ဒရယ်စစ်ကြောင်းက လက်ဦးမှုယူ၍တိုက်ခိုက်ခဲ့ရာ စစ်ကောင်စီဘက်မှ သေဆုံးထိခိုက်မှုများရှိသော်လည်း စာရင်းအတိအကျကို မသိရှိနိုင်သေးကြောင်း ဒေသခံကာကွယ်ရေးတပ်ဖွဲ့ဝင်တစ်ဦးကပြောသည်။ ကစယ်ဒိုဖက်ဒရယ် စစ်ကြောင်းမှရဲဘော်များထိခိုက်ကျဆုံးမှုမရှိဟုလည်းထုတ်ပြန်ထားသည်။
“လက်ဦးမှုယူပြီးတိုက်တာ သေဆုံးဒဏ်ရာရတာတော့ သေချာမသိသေးဘူး”ဟု ဒေသခံကာကွယ်ရေးတပ်ဖွဲ့ဝင်တစ်ဦးကပြောသည်။
အဆိုပါတိက်ခိုက်မှုတွင် စစ်ကောင်စီတပ်မှ သေဆုံးဒဏ်ရာရရှိသူ၁၀ ဦးခန့်ရှိနိုင်ကြောင်း Dawai Information Centre ကလည်းဖော်ပြသည်။အဆိုပါတိုက်ခိုက်မှုနှစ်ခုတွင် စစ်ကောင်စီတပ် သေဆုံးဒဏ်ရာရမှုအခြေအနေကိုPeople’s Spring ကသီးခြားအတည်မပြုနိုင်ပါ။
ထားဝယ်-မြိတ် ဘုတ်တောင်တွင် အောက်တိုဘာ ၁၂ ရက်က ညနေပိုင်းကလည်း စစ်ကောင်စီယာဉ် ၉ စီးပါ ယာဉ်တန်းကို ကစယ်ဒိုဖယ်ဒရယ်စစ်ကြောင်းက ရဲဘော်များက လက်နက်ကြီး၊လက်နက်ငယ်များဖြင့် ပစ်ခတ်တိုက်ခိုက်ခဲ့သေးသည်။