အာဏာသိမ်းစစ်ကောင်စီတပ်မှ တပ်ဖွဲ့ဝင် ငါးဦး ပြည်သူ့ဘက် အလင်းဝင်ရောက်လာကြောင်း ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့က ယနေ့(အောက်တိုဘာ ၂၉ ရက်)တွင် သတင်းထုတ်ပြန်သည်။
စစ်ကောင်စီတပ်ရင်း ခမရ (၃၅၈)မှ တပ်သား ၃ဦး နှင့်ခမရ (၄၃၂)မှ တပ်သား တစ်ဦး၊ ခလရ (၂၈၄)မှ တပ်သားတစ်ဦးတို့ အလင်းဝင် လာခြင်းဖြစ်သည်ဟု ဆိုသည်။
အဆိုပါ တပ်ဖွဲ့ဝင် ငါးဦးအား ကြာအင်းဆိပ်ကြီး ပအဖနှင့် KNLA တပ်ရင်း (၁၇)တပ်ခွဲ – ၂ ၊ နဂါးနီစစ်ကြောင်းတို့က လက်ခံကြိုဆိုခဲ့ပြီး စားဝတ် နေ ရေးအတွက် ထောက်ပံ့ကူညီပေးခဲ့ကြောင်း ဖော်ပြထားသည်။
အလင်းဝင်လာသည့် စစ်ကောင်စီတပ်သားများမှာ ခမရ(၃၅၈)မှ တပ်သားစောအတ္တလယ်၊ တပ်သား ချစ်ဝင်းဇော်၊ တပ်သား သန့်ဇော်တို့ဖြစ်ပြီး ခမရ (၄၃၂) မှ တပ်သား ကျော်လွင်ထွန်း ခလရ (၂၈၄)မှ တပ်သား မင်းသူရဇော်တို့ဖြစ်သည်။
Public Service Announcement
အဆိုပါ အလင်းဝင်လာသည့် တပ်သားများအနေဖြင့်လက်နက်ခဲယမ်းများ တပါတည်းယူဆောင် လာခြင်းရှိ၊ မရှိကို မဖော်ပြထား၍ ကြာအင်းဆိပ်ကြီး မြို့နယ်(ပအဖ)သို့ ဆက်သွယ်ထားဆဲဖြစ်သည်။
ကြာအင်ဆိပ်ကြီးမြို့နယ်တွင် ပြီးခဲ့သည့် ရက်ပိုင်းကလည်း KNLAနှင့် နဂါးနီစစ်ကြောင်းအပါအဝင် တော်လှန်ရေးပူးပေါင်းတပ်ဖွဲ့က ကွီလုံတိုင်တပ်စခန်းကို တိုက်ခိုက်သိမ်းပိုက်ခဲ့ရာ စစ်ကောင်စီတပ်နှင့် BGFမှ ၈ဦးသေဆုံးပြီး စစ်ကောင်စီတပ်ဖွဲ့ဝင် ၁၅ဦးနှင့် BGF ၁၇ဦးတို့ လက်နက်ချခဲ့သည်။ အဆိုပါ ဖြစ်စဉ်တွင်လက်နက်မျိုးစုံ ၄၃လက် ရရှိခဲ့ကြောင်း နဂါးနီစစ်ကြောင်းက ထုတ်ပြန်ထားသည်။
