စစ်ကောင်စီ၏ လူမဆန်သော သတ်ဖြတ်မှုများ၊ လေကြောင်းမှ ဗုံးကြဲတိုက်ခိုက်မှုများကြောင့် ကလေးသူငယ်ပေါင်း (၂၄၂)ဦးသေကြေပျက်စီးခဲ့ရပြီး ကလေးထောင်ပေါင်းများစွာ ထိခိုက်နစ်နာမှုများရှိနေကြောင်း NUG က ထုတ်ပြန်သည်။
ယမန်နေ့တွင် ကျရောက်သော အပြည်ပြည်ဆိုင်ရာကလေးများနေ့နှင့် ပတ်သက်၍ အမျိုးသားညီညွတ်ရေးအစိုးရ အမျိုးသမီး၊ လူငယ်နှင့် ကလေး သူငယ်ရေးရာဝန်ကြီးဌာန နှင့် လူ့အခွင့်အရေးဆိုင်ရာဝန်ကြီးဌာနတို့က ပူးတွဲထုတ်ပြန်ခြင်းဖြစ်သည်။
စစ်အုပ်စုသည် ကလေးငယ်ပေါင်း (၃၇၂)ဦးကို မတရားဖမ်းဆီးထားပြီး ယနေ့အချိန်အထိ ကလေး (၃၀၃) ဦးခန့် မှာ ဆိုးရွားသော အချုပ်စခန်းများ၊ အကျဉ်းထောင်များတွင် ခက်ခဲကြမ်းတမ်းစွာ နေထိုင်ဖြတ်သန်းနေရကြောင်း NUG က ဆိုသည်။
အပြည်ပြည်ဆိုင်ရာ ကလေးသူငယ်များနေ့တွင် ကလေးတိုင်းအတွက် မိသားစုနှင့် လုံခြုံစွာ နေထိုင်ခွင့်၊ ပျော်ရွှင်စွာ စာသင်ကြားခွင့်နှင့်အတူ ကလေးသူငယ်အခွင့်အရေးများ ပြန်လည်ရရှိစေရန်အတွက် ကုလသမဂ္ဂအပါအဝင် ကလေးသူငယ် အရေး လုပ်ကိုင်ဆောင်ရွက်နေသူများအားလုံး တက်ညီလက်ညီဖြင့် ဝိုင်းဝန်းလုပ်ဆောင်နိုင်ရန် NUG က တိုက်တွန်းသည်။
Public Service Announcement
ထို့အပြင် NUG သည် ကလေးသူငယ်များအတွက် လုံခြုံစိတ်ချခွင့်၊ ဖွံဖြိုးတိုးတက်ခွင့်၊ ပါဝင်ဆောင်ရွက် ခွင့်နှင့် လွတ်လပ်ငြိမ်းချမ်းစွာ စာသင်ကြားခွင့်များ များမကြာမီ ပြန်လည်ရရှိနိုင်ရန် ပြည်သူများအားလုံး နှင့်အတူ အထူးကြိုးပမ်းလုပ်ဆောင်သွားမည်ဟု ထုတ်ပြန်သည်။
